ന്യൂഡൽഹി: ഇന്ത്യൻ വനിതാ ക്രിക്കറ്റ് ടീമിന്റെ നേതൃത്വത്തിൽ നിർണായക മാറ്റം. സീനിയർ താരം ഹർമൻപ്രീത് കൗർ ക്യാപ്റ്റൻ സ്ഥാനം ഒഴിഞ്ഞതോടെ സ്മൃതി മന്ദാനയെ മൂന്ന് ഫോർമാറ്റുകളിലെയും ഇന്ത്യൻ വനിതാ ടീമിന്റെ പുതിയ മുഴുവൻ സമയ നായികയായി ബി.സി.സി.ഐ പ്രഖ്യാപിച്ചു.
ടി20, ഏകദിനം, ടെസ്റ്റ് എന്നീ മൂന്ന് ഫോർമാറ്റുകളിലും ഇനി സ്മൃതി മന്ദാനയായിരിക്കും ഇന്ത്യയെ നയിക്കുക. ഹർമൻപ്രീത് കൗർ, ബി.സി.സി.ഐ സെക്രട്ടറി ദേവജിത് സൈകിയ, ഹെഡ് കോച്ച് അമോൽ മജുംദാർ, സ്മൃതി മന്ദാന എന്നിവർ പങ്കെടുത്ത അവലോകന യോഗത്തിന് ശേഷമാണ് നേതൃത്വമാറ്റത്തിന് തീരുമാനമായത്.
ക്യാപ്റ്റൻസി ഒഴിഞ്ഞെങ്കിലും ഹർമൻപ്രീത് കൗർ ടീമിന്റെ പ്രധാന ബാറ്ററായി തുടരും. 2016 മുതൽ ഇന്ത്യയുടെ ടി20 ടീമിനെ നയിച്ച ഹർമൻപ്രീത് പിന്നീട് മൂന്ന് ഫോർമാറ്റുകളിലും നായികയായി. 2025ൽ ഇന്ത്യ ആദ്യമായി ഏകദിന ലോകകപ്പ് കിരീടം സ്വന്തമാക്കിയത് ഹർമൻപ്രീതിന്റെ നേതൃത്വത്തിലായിരുന്നു.
അന്താരാഷ്ട്ര ക്രിക്കറ്റിൽ 2013ൽ അരങ്ങേറ്റം കുറിച്ച സ്മൃതി മന്ദാനയ്ക്ക് നേതൃത്വത്തിൽ നേരത്തെയും പരിചയമുണ്ട്. ഹർമൻപ്രീതിന്റെ അഭാവത്തിൽ 18 ടി20 മത്സരങ്ങളിലും നാല് ഏകദിന മത്സരങ്ങളിലും ഇന്ത്യയെ നയിച്ചിട്ടുള്ള സ്മൃതി, വനിതാ പ്രീമിയർ ലീഗിലും നായികയായി മികവ് തെളിയിച്ചിട്ടുണ്ട്. റോയൽ ചലഞ്ചേഴ്സ് ബെംഗളൂരുവിനെ 2024ലും 2026ലും WPL കിരീടത്തിലേക്ക് നയിച്ചതും സ്മൃതിയുടെ നേതൃത്വ മികവിന് കരുത്തേകുന്നു.
ഇന്ത്യൻ ടീമിനെ നയിക്കാനുള്ള അവസരം വലിയ ബഹുമതിയാണെന്ന് സ്മൃതി മന്ദാന പ്രതികരിച്ചു. രാജ്യത്തെ പ്രതിനിധീകരിക്കുന്നതിന്റെ പ്രാധാന്യം തനിക്ക് എന്നും വലുതാണെന്നും തന്നിൽ വിശ്വാസമർപ്പിച്ച ബി.സി.സി.ഐയ്ക്കും സെലക്ടർമാർക്കും സഹതാരങ്ങൾക്കും നന്ദിയുണ്ടെന്നും സ്മൃതി പറഞ്ഞു. ഹർമൻപ്രീത് കൗറിന്റെ ടീമിനുള്ള സംഭാവനകളെ അംഗീകരിച്ചുകൊണ്ട്, ഇന്ത്യൻ വനിതാ ടീമിനെ കൂടുതൽ ഉയരങ്ങളിലേക്ക് നയിക്കുകയാണ് ലക്ഷ്യമെന്നും പുതിയ നായിക വ്യക്തമാക്കി.
പൂർണ്ണസമയ ക്യാപ്റ്റനെന്ന നിലയിൽ സ്മൃതി മന്ദാനയുടെ ആദ്യ ദൗത്യം ഇന്ത്യയുടെ സിംബാബ്‌വെ പരമ്പരയായിരിക്കും. റായ്പൂരിലെ ഷഹീദ് വീർ നാരായൺ സിംഗ് ഇന്റർനാഷണൽ സ്റ്റേഡിയത്തിൽ ഒക്ടോബർ 16 മുതൽ 28 വരെ മൂന്ന് ടി20 മത്സരങ്ങളും മൂന്ന് ഏകദിന മത്സരങ്ങളുമാണ് ഇന്ത്യ കളിക്കുക.
യുവതാരം ഷെഫാലി വർമ്മയെ ഇന്ത്യയുടെ പുതിയ വൈസ് ക്യാപ്റ്റനായും പ്രഖ്യാപിച്ചിട്ടുണ്ട്. ഹർമൻപ്രീത് കൗറിന്റെ നേതൃത്വത്തിന് ശേഷം സ്മൃതി മന്ദാനയുടെ കൈകളിലേക്ക് ഇന്ത്യൻ വനിതാ ക്രിക്കറ്റിന്റെ ക്യാപ്റ്റൻസി എത്തുമ്പോൾ പുതിയൊരു അധ്യായത്തിനാണ് തുടക്കമാകുന്നത്.