ന്യുഡല്ഹി: ഇന്ഡിഗോയുടെ വിമാന സര്വീസുകള് പൂര്ണമായും താളം തെറ്റിയതോടെ അവസരം മുതലാക്കി യാത്രാക്കൂലി കൂട്ടി മറ്റ് വിമാന കമ്പനികള്.
എയര് ഇന്ത്യ അടക്കമുള്ള വിമാനക്കമ്പനികള് ഞായറാഴ്ച വരെയുള്ള ടിക്കറ്റുകള്ക്ക് നാലിരട്ടിയാണ് വര്ധിപ്പിച്ചത്. ഇത് യാത്രക്കാരെ കൂടുതല് പ്രതിസന്ധിയിലാക്കി. ഡല്ഹിയില് നിന്ന് നാളെ ചെന്നയിലേക്കുള്ള വിമാന നിരക്ക് ഒരു ലക്ഷത്തിന് മുകളിലാണ്. നാളെ വീണ്ടും ടിക്കറ്റ് വില ഉയരുമെന്നാണ് സൂചന.
ഡല്ഹി, മുംബൈ, ബംഗളൂരു. ചെന്നൈ, പൂനെ, കൊച്ചി തുടങ്ങിയ പ്രധാന നഗരങ്ങളിലേക്കുള്ള ടിക്കറ്റ് നിരക്കും വര്ധിപ്പിച്ചു. നാളെ ഡല്ഹിയില് നിന്ന് കൊച്ചിയിലേക്കും തിരുവന്തപുരത്തേക്കുമുള്ള വിമാന ടിക്കറ്റ് നിരക്ക് അമ്പതിനായിരത്തിന് മുകളിലാണ്.
ഇന്ത്യയിലെ ആഭ്യന്തര സര്വീസുകളില് അറുപത് ശതമാനവും ഇന്ഡിഗോ ആണ് നടത്തുന്നത്. ഇന്ഡിഗോ ജീവനക്കാര് പണിമുടക്കിയതോടെയാണ് ആഭ്യന്തര സര്വീസുകള് തടസപെടുന്ന സാഹചര്യം ഉണ്ടായത്. ആ അവസരം മറ്റ് വിമാനക്കമ്പനികള് യാത്രക്കാരുടെ പോക്കറ്റടിക്കുന്നത്.
ഞായറാഴ്ച വരെയുള്ള ടിക്കറ്റ് നിരക്കാണ് വിമാനക്കമ്പനികള് വന് തോതില് ഉയര്ത്തിയത്. ഡല്ഹിയില് നിന്നും ചെന്നൈയിലേക്കുള്ള എയര് ഇന്ത്യ വിമാനങ്ങളിലെ ഇന്നത്തെ ടിക്കറ്റുകള് മുഴുവനായി വിറ്റു തീര്ന്നു. നാളെത്തെ ടിക്കറ്റ് നിരക്ക് ഒരു ലക്ഷത്തിലധികമാണ്. കേന്ദ്ര സര്ക്കാരിന്റെ തെറ്റായ നയങ്ങളാണ് ഇത്തരമൊരു സാഹചര്യം സൃഷ്ടിച്ചതെന്ന് പ്രതിപക്ഷ പാര്ട്ടികള് ആരോപിച്ചു.