റോം: ലോകപ്രശസ്ത കലാകാരൻ മൈക്കലാഞ്ചലോ ബ്യൂണറോട്ടിയുടേതെന്ന് കരുതുന്ന ഇതുവരെ തിരിച്ചറിയപ്പെടാത്ത ഒരു ശില്പം റോമിലെ ചരിത്ര പ്രസിദ്ധമായ ബസിലിക്കയിൽ കണ്ടെത്തി. നൂറ്റാണ്ടുകളായി ആരുടെയും ശ്രദ്ധയിൽപ്പെടാതെ കിടന്ന ക്രിസ്തുവിന്റെ മാർബിൾ പ്രതിമയാണ് വിദഗ്ധ പരിശോധനകൾക്കൊടുവിൽ മൈക്കലാഞ്ചലോയുടേതാണെന്ന് സ്ഥിരീകരിച്ചത്.
റോമിലെ വിയ നോമെന്റാനയിലുള്ള സാന്റ്’ആഗ്നീസ് ഫ്യൂറി ലെ മുറ (Sant'Agnese fuori le mura) ബസിലിക്കയിലാണ് ഈ അത്ഭുത കണ്ടെത്തൽ നടന്നത്. കാലപ്പഴക്കം കൊണ്ടും പലപ്പോഴായി നടത്തിയ പെയിന്റിംഗുകൾ കൊണ്ടും ശില്പത്തിന്റെ യഥാർഥ രൂപം മറഞ്ഞുപോയ നിലയിലായിരുന്നു. ബസിലിക്കയിൽ നടന്ന പുനരുദ്ധാരണ പ്രവർത്തനങ്ങൾക്കിടയിലാണ് ശില്പത്തിന്റെ സവിശേഷമായ ശൈലി വിദഗ്ധരുടെ ശ്രദ്ധയിൽപ്പെട്ടത്.
കലാചരിത്രകാരന്മാരും പുരാവസ്തു ഗവേഷകരും മാസങ്ങളോളം നീണ്ട ശാസ്ത്രീയ പരിശോധനകളാണ് ശില്പത്തിന്മേൽ നടത്തിയത്. മൈക്കലാഞ്ചലോയുടെ സിസ്റ്റൈൻ ചാപ്പലിലെ വിഖ്യാത ചിത്രങ്ങളിലെയും മറ്റ് ശില്പങ്ങളിലെയും പോലെ ശരീരഘടനയിലുള്ള അതീവ കൃത്യതയും നിർമ്മാണ ശൈലിയും ഈ സൃഷ്ടിയിലും പ്രകടമാണ്. മാർബിളിലെ മിനുക്കുപണികളും ശൈലിയും പരിശോധിച്ച ശേഷമാണ് ഇത് മൈക്കലാഞ്ചലോയുടെ തന്നെ സൃഷ്ടിയാണെന്ന് ഗവേഷകർ ഉറപ്പിച്ചത്.
മൈക്കലാഞ്ചലോയുടെ അറിയപ്പെടാത്ത സൃഷ്ടികൾ ഇനിയും കണ്ടെത്താനുണ്ടെന്ന കലാ ലോകത്തിന്റെ പ്രതീക്ഷകൾക്ക് ഈ കണ്ടെത്തൽ കരുത്തുപകരുന്നു. നിലവിൽ ഈ ശില്പം മൈക്കലാഞ്ചലോയുടെ പേരിൽ പുനർനാമകരണം ചെയ്തിട്ടുണ്ട്. ലോകമെമ്പാടുമുള്ള കലാസ്നേഹികൾക്കും ഗവേഷകർക്കും ഒരുപോലെ ആവേശം നൽകുന്ന വാർത്തയാണിത്.