ലോസ് ആഞ്ചലസ്: ഗ്ലാമറിന്റെയും പ്രശസ്തിയുടെയും മാസ്മരിക ലോകമായ ഹോളിവുഡിൽ പതറാതെ നിൽക്കാൻ തനിക്ക് കരുത്ത് നൽകിയത് ക്രിസ്തീയ വിശ്വാസമാണെന്ന് പ്രശസ്ത നടി കാത്തി മൊറിയാർട്ടി. 'റേജിങ് ബുൾ', 'കിന്റർഗാർട്ടൻ കോപ്പ്' തുടങ്ങിയ ലോകപ്രശസ്ത ചിത്രങ്ങളിലൂടെ പ്രേക്ഷക ഹൃദയം കീഴടക്കിയ താരം ഒരു കത്തോലിക്കാ മാധ്യമത്തിന് നൽകിയ അഭിമുഖത്തിലാണ് തന്റെ ആത്മീയ ജീവിതത്തെക്കുറിച്ച് വാചാലയായത്.
ലോസ് ആഞ്ചലസ് നഗരത്തിലെ തിരക്കുകൾക്കിടയിൽ കടുത്ത ഏകാന്തത അനുഭവിച്ച നിമിഷങ്ങളിൽ പ്രാർത്ഥന മാത്രമായിരുന്നു തന്റെ ഏക ആശ്വാസമെന്ന് കാത്തി വെളിപ്പെടുത്തി. "ഹോളിവുഡിന്റെ വർണാഭമായ ലോകത്ത് 30 വർഷത്തോളം പിടിച്ചുനിൽക്കാൻ എന്നെ സഹായിച്ചത് കുടുംബത്തിൽ നിന്ന് ലഭിച്ച ഉറച്ച വിശ്വാസമാണ്." താരം പറഞ്ഞു.
തന്റെ പിതാവ് പകർന്നുനൽകിയ വിശ്വാസദീപ്തിയാണ് ജീവിതത്തിലെ പ്രതിസന്ധികളിൽ വഴികാട്ടിയായതെന്ന് കാത്തി ഓർക്കുന്നു. വിശുദ്ധ പദ്രെ പിയോയോടുള്ള ഭക്തിയും കുട്ടിക്കാലം മുതൽ എല്ലാ വൈകുന്നേരങ്ങളിലും മുടങ്ങാതെ ചൊല്ലിയിരുന്ന കുടുംബ ജപമാലയും ഹോളിവുഡിന്റെ വഴിതെറ്റിക്കുന്ന മായാലോകത്ത് തനിക്ക് സംരക്ഷണ കവചമായെന്ന് അവർ കൂട്ടിച്ചേർത്തു.
ഇപ്പോൾ ന്യൂയോർക്കിൽ വിശ്രമ ജീവിതം നയിക്കുന്ന കാത്തി തന്റെ മക്കളെയും കൊച്ചു മക്കളെയും വിശ്വാസവഴിയിലാണ് വളർത്തുന്നത്. തന്റെ ആത്മീയമായ നിലപാടുകളെക്കുറിച്ച് താരം പറയുന്നത് ഇങ്ങനെ:"ദിവ്യബലിയിൽ പങ്കെടുക്കുമ്പോൾ ഞാൻ ഗാനങ്ങൾ ഉറക്കെ പാടും. ആരെങ്കിലും അത് കണ്ട് കളിയാക്കിയാലും എനിക്കൊരു പ്രശ്നവുമില്ല. ആ പാട്ടുകളിലൂടെ ലഭിക്കുന്ന സമാധാനമാണ് എനിക്ക് പ്രധാനം."
കാത്തിയുടെ മകൻ ജോയിയും അമ്മയുടെ വഴിയിലൂടെ വിശ്വാസ പ്രഘോഷണ രംഗത്ത് സജീവമാണ്. 15-ാം വയസ് മുതൽ സൺഡേ സ്കൂളിൽ വേദപാഠം പഠിപ്പിക്കുന്ന ജോയിയും തന്റെ കുടുംബത്തിന്റെ ആത്മീയ അടിത്തറ കാത്തുസൂക്ഷിക്കുന്നു. ഹോളിവുഡ് താരങ്ങൾക്കിടയിൽ കാത്തിയുടെ ഈ പരസ്യമായ വിശ്വാസ പ്രഖ്യാപനം സോഷ്യൽ മീഡിയയിൽ വലിയ ചർച്ചയാവുകയാണ്.