ബ്രസീൽ: ദൈവസ്നേഹത്തിന് ഭാഷയുടെ അതിർവരമ്പുകളില്ലെന്ന് തെളിയിക്കുന്ന ഹൃദയസ്പർശിയായ ദൃശ്യങ്ങൾ സോഷ്യൽ മീഡിയയിൽ വൈറലാകുന്നു. ബ്രസീലിലെ ഒരു കത്തോലിക്കാ ദേവാലയത്തിൽ നടന്ന സ്ഥൈര്യലേപന ശുശ്രൂഷയ്ക്കിടയിലാണ് ഈ അപൂർവ്വ കാഴ്ച വിശ്വാസികളുടെ മനംകവർന്നത്.
കേൾവിശക്തിയില്ലാത്ത ഒരു പെൺകുട്ടിയുമായി ആംഗ്യഭാഷയിൽ സംവദിച്ച് ബിഷപ്പ് ആശീർവാദം നൽകുന്നതാണ് വീഡിയോയുടെ ഉള്ളടക്കം. വെളുത്ത വസ്ത്രമണിഞ്ഞ് അൾത്താരയ്ക്ക് മുന്നിൽ നിന്ന പെൺകുട്ടിയോട് ബിഷപ്പ് ആംഗ്യഭാഷയിൽ സംസാരിക്കുന്നതും, പെൺകുട്ടി പ്രാർത്ഥനാപൂർവ്വം അതിന് മറുപടി നൽകുന്നതും ഏറെ വികാരനിർഭരമായ നിമിഷമായിരുന്നു. തുടർന്ന് പരിശുദ്ധാത്മാവിന്റെ കൃപയാൽ ബിഷപ്പ് പെൺകുട്ടിയുടെ നെറ്റിയിൽ വിശുദ്ധ തൈലം പൂശി അനുഗ്രഹിച്ചു.
വാക്കുകൾക്ക് അതീതമായ ദൈവീക സ്നേഹത്തെയും സഭയുടെ സ്നേഹനിർഭരമായ കരുതലുമാണ് ഈ ദൃശ്യങ്ങൾ ലോകത്തോട് വിളിച്ചു പറയുന്നത്. വിശ്വാസത്തിന് ശബ്ദമല്ല, ഹൃദയശുദ്ധിയാണ് ആവശ്യമെന്ന വലിയ സന്ദേശമാണ് ഈ വീഡിയോ നൽകുന്നത്. നിമിഷനേരം കൊണ്ടാണ് ദശലക്ഷക്കണക്കിന് ആളുകൾ ഈ വീഡിയോ കണ്ടതും പങ്കുവെച്ചതും. കേരളത്തിലെ വിശ്വാസികൾക്കിടയിലും ഈ വീഡിയോ വലിയ രീതിയിൽ പ്രചരിക്കുകയാണ്.