മ്യൂണിക്ക്: ജർമ്മനിയിൽ വിശുദ്ധ കുർബാന നടന്നുകൊണ്ടിരുന്ന കത്തോലിക്കാ ദേവാലയത്തിലേക്ക് അജ്ഞാതർ പടക്കങ്ങളും തീപ്പന്തങ്ങളും എറിഞ്ഞ് ആക്രമണം നടത്തി. മ്യൂണിക്ക്-ഫ്രെയ്‌സിംഗ് അതിരൂപതയ്ക്കു കീഴിലുള്ള ഹാറിനടുത്ത സീർസിയിലെ സെന്റ് ബോനിഫസ് പള്ളിയിലാണ് നടുക്കുന്ന സംഭവമുണ്ടായത്.
ഒന്നാം ക്ലാസുകാരായ കുരുന്നുകൾക്കുവേണ്ടിയുള്ള പ്രത്യേക വിശുദ്ധ കുർബാനയും ആശീർവാദ പ്രാർത്ഥനയും നടക്കവെയായിരുന്നു ഈ അതിക്രമം. സമയബന്ധിതമായ ഇടപെടൽ മൂലം മാത്രമാണ് വൻ ദുരന്തവും വലിയ നാശനഷ്ടങ്ങളും ഒഴിവായത്. പ്രാർത്ഥനാ വേളയിലെ ഭയത്തിന്റെയും വിറയലിന്റെയും നിമിഷങ്ങൾ തിരുക്കർമ്മങ്ങൾ പുരോഗമിക്കുന്നതിനിടയിൽ ദേവാലയത്തിന്റെ പ്രവേശന കവാടത്തിലൂടെയെത്തിയ അജ്ഞാതർ കത്തുന്ന പടക്കങ്ങളും തീപിടിത്ത സാമഗ്രികളും അകത്തേക്ക് എറിയുകയായിരുന്നു.
ദേവാലയത്തിനുള്ളിൽ പുക ഉയരുന്നത് ശ്രദ്ധയിൽപ്പെട്ട ഉടൻ തന്നെ തിരുക്കർമ്മങ്ങളിൽ പങ്കെടുത്ത വിശ്വാസി സമയോചിതമായി ഇടപെട്ടു. കത്തുന്ന വസ്തു വേഗത്തിൽ പുറത്തെടുത്ത് സമീപത്തെ അലങ്കാര ജലാശയത്തിലേക്ക് എറിഞ്ഞുകളഞ്ഞതിനാൽ മാത്രമാണ് വലിയൊരു അപകടം ഒഴിവായത്.
കുട്ടികളും മാതാപിതാക്കളും അടക്കം നിരവധി പേർ പങ്കെടുത്തിരുന്ന ചടങ്ങിൽ ആളപായമൊന്നും സംഭവിച്ചിട്ടില്ല എന്നത് ദൈവീക അത്ഭുതമായിട്ടാണ് വിശ്വാസികൾ കാണുന്നത്.
ഒറ്റപ്പെട്ട സംഭവമല്ലെന്ന് പോലീസ് ഇത് ഒറ്റപ്പെട്ട ഒന്നല്ലെന്നും സമാനമായ രീതിയിൽ പ്രദേശത്ത് മറ്റ് അഞ്ചോളം ആക്രമണങ്ങൾ കൂടി നടന്നിട്ടുണ്ടെന്നും പോലീസ് വ്യക്തമാക്കി. ഒരു വ്യാപാര സ്ഥാപനത്തിന്റെ പ്രവേശന കവാടത്തിലും മൂന്ന് വീടുകളുടെ ബാൽക്കണികളിലേക്കും സമാനമായി സ്ഫോടക വസ്തുക്കളും പടക്കങ്ങളും എറിയപ്പെട്ടിട്ടുണ്ട്. ഏകദേശം 14 വയസ് പ്രായം തോന്നിക്കുന്ന കൗമാരക്കാരനാണ് ഇത്തരം അക്രമങ്ങൾക്ക് പിന്നിലെന്നാണ് പോലീസിന്റെ പ്രാഥമിക നിഗമനം.
ദേവാലയങ്ങളുടെയും ആരാധനാലയങ്ങളുടെയും പവിത്രത തകർക്കാനും സമാധാനാന്തരീക്ഷം നശിപ്പിക്കാനുമുള്ള ഇത്തരം സാമൂഹ്യവിരുദ്ധ നീതികൾക്കെതിരെ ശക്തമായ അന്വേഷണം ആരംഭിച്ചതായി അധികൃതർ അറിയിച്ചു. കുറ്റവാളികളെ എത്രയും വേഗം നിയമത്തിനു മുന്നിൽ കൊണ്ടുവരാനുള്ള തീവ്രശ്രമത്തിലാണ് സുരക്ഷാ ഉദ്യോഗസ്ഥർ.