തീര്‍ത്തു കളയുന്നത് കാണണം: അമിത് ഷായുടെ വെല്ലുവിളി സ്വീകരിക്കുന്നുവെന്ന് ഉദ്ധവ് താക്കറെ

മുംബൈ: മുംബൈ കോർപ്പറേഷൻ തിരഞ്ഞെടുപ്പിൽ ശിവസേനയെ തറപറ്റിക്കുമെന്ന അമിത് ഷായുടെ വെല്ലുവിളി സ്വീകരിക്കുന്നു. ശിവസേനയെ തീർത്തുകളയുമെന്ന് ഭീഷണി മുഴക്കുന്ന ബിജെപി യെ നേരിടാൻ ഒപ്പം അടിയുറച്ച ശിവസൈനികരുണ്ടെന്നും ശിവസേന അധ്യക്ഷൻ ഉദ്ധവ് താക്കറെ‍ പറഞ്ഞു.

വഞ്ചകനായ ഉദ്ധവ് താക്കറെയെ പാഠം പഠിപ്പിക്കണമെന്ന കേന്ദ്രമന്ത്രി അമിത് ഷായുടെ പരാമർശത്തിന് മറുപടിയായി സംസാരിക്കുകയായിരുന്നു താക്കറെ. കൂടെനിന്ന് ഒറ്റുകൊടുക്കുന്നവരെക്കാൾ പാർട്ടിക്കൊപ്പമുള്ള വിശ്വസ്തരുടെ കരുത്തിൽ നമ്മൾ വിജയിക്കും. ആര് എത്രയൊക്കെ വില പറഞ്ഞാലും വിശ്വസ്തത വിൽക്കാനാവില്ല. ഒറ്റുകാരെക്കാൾ എപ്പോഴും നല്ലത്, എണ്ണത്തിൽ കുറവാണെങ്കിലും ഒപ്പമുള്ള വിശ്വസ്തരാണ് പാർട്ടി നേതാക്കളുടെ യോഗത്തിൽ ഉദ്ധവ് പറഞ്ഞു.

പാർട്ടി വിട്ടുപോയ നേതാക്കളോട് പറഞ്ഞത് വാതിലുകൾ മലർക്കെ തുറന്നു കിടക്കുന്നുവെന്നാണ്. പാർട്ടിയിൽ നിൽക്കുന്നുവെങ്കിൽ വിശ്വസ്തതയോടെ നിലയുറപ്പിക്കുക. അല്ലെങ്കിൽ വിട്ടുപോകാം പാർട്ടിയിൽ നിന്നും മാറി ബിജെപിക്കൊപ്പം ചേർന്ന ഏക്‌നാഥ് ഷിന്ദേയ്ക്കും കൂട്ടർക്കും എതിരെ യോഗത്തിൽ താക്കറെ ആഞ്ഞടിച്ചു.