ഭോപ്പാല്‍: കൊലപാതക കേസ് തെളിയിക്കാന്‍ പൊലീസിന് സഹായമായത് ഈച്ച. മധ്യപ്രദേശിലെ ജബല്‍പുരിലാണ് 'ഈച്ച' അനുസ്മരിപ്പിക്കുന്ന സംഭവം നടന്നത്. മനോജ് ഠാക്കൂര്‍ എന്ന 26 കാരന്റെ കൊലപാതകമാണ് ഈച്ചയുടെ സഹായത്തോടെ തെളിയിച്ചതെന്ന് പൊലീസ് വ്യക്തമാക്കുന്നു.
വ്യാഴാഴ്ച രാത്രി 19 കാരനായ മരുമകന്‍ ധരം സിങ്ങിനൊപ്പം മദ്യപിക്കാന്‍ പോയ മനോജ് ഠാക്കൂറിനെ കാണാതാകുകയായിരുന്നു. പിറ്റേന്ന് കുടുംബം പൊലീസില്‍ പരാതി നല്‍കുകയും മണിക്കൂറുകളോളം തിരച്ചില്‍ നടത്തുകയും ചെയ്തു. വൈകുന്നേരത്തോടെ മനോജിന്റെ മൃതദേഹം കണ്ടെത്തി.
അവസാനമായി ഒപ്പമുണ്ടായിരുന്ന ധരം സിങ്ങിനെയാണ് പൊലീസ് സംശയിച്ചത്. ചോദ്യം ചെയ്തെങ്കിലും വിശ്വസിനീയമായ തരത്തിലാണ് ഇയാള്‍ പൊലീസിന് മറുപടികള്‍ നല്‍കിയത്. കൊലയ്ക്ക് പിന്നിലെ കാരണം പറയാനോ സി.സി.ടി.വി ദൃശ്യവും ദൃക്സാക്ഷികളും ഉള്‍പ്പെടുയുള്ള തെളിവുകള്‍ കണ്ടെത്താനോ പൊലീസിന് കഴിഞ്ഞില്ല.
പൊലീസിന് ധരം സിങ്ങിനെ തന്നെയായിരുന്നു സംശയം. അതോടെ ഇയാളെ വീണ്ടും ചോദ്യം ചെയ്യാന്‍ പൊലീസ് തീരുമാനിച്ചു. ഇതിനിടെയാണ് സിനിമകളെ വെല്ലുന്ന ട്വിസ്റ്റ് സംഭവിച്ചത്. ചോദ്യം ചെയ്യലിനിടെ ധരം സിങ്ങിനെ ചുറ്റി ഒരു ഈച്ച പറക്കുന്നത് അന്വേഷ ഉദ്യോഗസ്ഥനായ അഭിഷേക് പയാസിയുടെ ശ്രദ്ധയില്‍ പെട്ടു. മറ്റാരുടെയും സമീപം പോകാതെ ഈച്ച ഇയാളെ മാത്രമാണ് ചുറ്റിപ്പറന്നത്. തുടര്‍ന്ന് ധരം സിങ്ങിനോട് ധരിച്ച ഷര്‍ട്ട് ഊരി നല്‍കാന്‍ അഭിഷേക് ആവശ്യപ്പെട്ടു.
ഉടന്‍ ഷര്‍ട്ട് ഫോറന്‍സിക് പരിശോധനയ്ക്ക് അയച്ചു. പരിശോധനാ ഫലം വന്നതോടെയാണ് കേസില്‍ നിര്‍ണായകമായ തെളിവ് ലഭിക്കുകയും ധരം സിങ്ങാണ് പ്രതിഎന്ന് ഉറപ്പിക്കുകയും ചെയ്തത്. നഗ്‌നനേത്രങ്ങളാല്‍ കാണാന്‍ കഴിയാത്ത രക്തക്കറ ഷര്‍ട്ടില്‍ ഉണ്ടായിരുന്നു എന്നായിരുന്നു പരിശോധനാ ഫലം. ഇതിന്റെ ചുവട് പിടിച്ച് നടത്തിയ ചോദ്യം ചെയ്യലിനൊടുവില്‍ ധരം സിങ് കുറ്റം സമ്മതിക്കുകയായിരുന്നു. ഭക്ഷണം കഴിച്ചതിന്റെ പണം നല്‍കുന്നത് സംബന്ധിച്ച തര്‍ക്കമാണ് കൊലപാതകത്തിലേക്ക് നയിച്ചതെന്ന് ഇയാള്‍ പൊലീസിനോട് പറഞ്ഞു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.