വാഷിങ്ടണ്‍: ബഹിരാകാശ പേടകമായ സ്റ്റാര്‍ലൈനറില്‍ ഇനിയും പറക്കുമെന്ന് സുനിത വില്യംസും ബുച്ച് വില്‍മോറും. കഴിഞ്ഞ യാത്രയില്‍ നേരിട്ട പ്രതിസന്ധികള്‍ പരിഹരിക്കും. ഒന്‍പത് മാസത്തെ ബഹിരാകാശ യാത്രയ്ക്ക് ശേഷം തിരിച്ചെത്തിയ സുനിതയും വില്‍മോറും നാസയുടെ ജോണ്‍സണ്‍ സ്പേസ് സെന്ററില്‍ മാധ്യമങ്ങളോട് പ്രതികരിക്കുകയായിരുന്നു. ഇതാദ്യമായാണ് യാത്രക്ക് ശേഷം ഇരുവരും മാധ്യമങ്ങളെ കാണുന്നത്.
ഇനിയും ബഹിരാകാശ യാത്രകള്‍ക്ക് തയ്യാറാണെന്നും എന്നാല്‍ ചില പോരായ്മകള്‍ പരിഹരിക്കപ്പെടാനുണ്ടെന്നും ഇരുവരും പറഞ്ഞു. സ്റ്റാര്‍ലൈനര്‍ വളരെ കാര്യശേഷിയുള്ള ബഹിരാകാശ വാഹനമാണ്. അത് ഭാവിയില്‍ ഗവേഷണങ്ങള്‍ക്ക് കരുത്ത് പകരുമെന്നും സുനിത വില്യംസ് പറഞ്ഞു. ഭൂമിയില്‍ തിരിച്ചെത്തി സാധാരണ ജീവിതത്തിലേക്ക് വരാന്‍ ഏറെ പ്രയാസപ്പെടേണ്ടി വന്നു.
ഭൂമിയില്‍ തിരിച്ചെത്തിയതിന് പിന്നാലെ ഫിസിക്കല്‍ ട്രെയിനര്‍, ന്യൂട്രീഷന്‍ വിദഗ്ധര്‍ എന്നിവരുടെ മേല്‍നോട്ടത്തിലായിരുന്നു തങ്ങള്‍. വെയ്റ്റ് ലിഫ്റ്റിങ്, സ്‌ക്വാട്സ് അടക്കമുള്ള വ്യായാമങ്ങള്‍ ചെയ്യേണ്ടി വന്നു. ബഹിരാകാശത്ത് തുടര്‍ന്ന സമയത്തും ഗവേഷണങ്ങള്‍ തുടരുകയായിരുന്നു. അസ്ഥികള്‍ക്കും മസിലുകള്‍ക്കും തകരാര്‍ സംഭവിക്കാതിരിക്കാന്‍ ദിവസവും ബഹിരാകാശത്ത് വച്ച് വ്യായാമം ചെയ്യേണ്ടി വന്നുവെന്നും ഇരുവരും പറഞ്ഞു.
ജീവിതത്തില്‍ തന്നെ ശക്തനാക്കിയത് ഈ ബഹിരാകാശ ജീവിതമായിരുന്നുവെന്ന് വില്‍മോറും വ്യക്തമാക്കി. ബഹിരാകാശത്ത് തുടരവേ ഒരിക്കല്‍ പോലും നിരാശ തോന്നിയിട്ടില്ല. നാസയുടെ കൂട്ടായ പരിശ്രമം ഗുണം ചെയ്തു. അവിടെ തുടരേണ്ടി വന്ന സമയത്തും തിരിച്ചെത്തിയപ്പോഴും തങ്ങളുടെ കാര്യത്തില്‍ ലോകത്തിന് ഉണ്ടായ കരുതലിന് ഇരുവരും നന്ദി പ്രകടിപ്പിച്ചു.
തങ്ങളുടെ തിരിച്ചുവരവ് ബഹിരാകാശ യാത്രികരുടെ സുരക്ഷിതത്വം സംബന്ധിച്ച നാസയുടെ നിശ്ചയദാര്‍ഢ്യമാണ്. തിരിച്ച് വരവ് വൈകിയ സംഭവത്തില്‍ ആരെയും കുറ്റപ്പെടുത്താനില്ല. പ്രശ്ന പരിഹാരത്തിനാണ് ശ്രമിക്കേണ്ടത്. ചന്ദ്രനിലേക്കും ചൊവ്വയിലേക്കുമുള്ള യാത്രകള്‍ക്ക് ഇത് ഗുണം ചെയ്യും. തങ്ങളുടെ സുദീര്‍ഘമായ ബഹിരാകാശ വാസം ഗവേഷകര്‍ക്കും ഗുണം ചെയ്യും. തിരികെയുള്ള യാത്രയും ഏറെ ത്രില്ലിങ് ആയിരുന്നുവെന്ന് ഇരുവരും പറഞ്ഞു.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.