വാഷിങ്ടണ്‍: ചില രാജ്യങ്ങള്‍ പ്രകോപിപ്പിക്കുന്നുവെന്നും അതിനാല്‍ ആണവായുധങ്ങള്‍ പരീക്ഷിക്കാന്‍ തയാറെടുക്കുകയാണെന്നും അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. മൊറൊട്ടോറിയം അവസാനിപ്പിച്ച് ആണവായുധ പരീക്ഷണങ്ങള്‍ ഉടന്‍ ആരംഭിക്കണമെന്നാണ് ട്രംപിന്റെ ഉത്തരവ്.
റഷ്യ പുതിയ ആണവായുധ പരീക്ഷണങ്ങള്‍ നടത്തിയ സാഹചര്യത്തിലാണ് തീരുമാനം. ഇതോടെ 33 വര്‍ഷത്തിന് ശേഷം യു.എസ് ആദ്യമായി ഒരു ആണവായുധ പരീക്ഷണം നടത്താനൊരുങ്ങുകയാണ്. മറ്റ് രാജ്യങ്ങളുടെ ആണവ പരീക്ഷണങ്ങള്‍ക്ക് തുല്യമായ രീതിയില്‍ പരീക്ഷണം നടത്താനാണ് യു.എസിലെ യുദ്ധകാര്യ വകുപ്പിന് ട്രംപ് നിര്‍ദേശം നല്‍കിയിരിക്കുന്നത്.
ചില രാജ്യങ്ങള്‍ ആണവായുധങ്ങള്‍ പരീക്ഷിക്കുന്നതിനുള്ള മറുപടിയാണിത്. പരീക്ഷണത്തിന് വേണ്ട നടപടികള്‍ ഉടന്‍ ആരംഭിക്കും. മറ്റ് രാജ്യങ്ങളേക്കാള്‍ ആണവായുധങ്ങള്‍ യുഎസിനുണ്ടെന്നും ട്രംപ് വ്യക്തമാക്കി. ആണവ ശേഷിയുള്ള സമുദ്രാന്തര ഡ്രോണുകള്‍ റഷ്യ കഴിഞ്ഞ ദിവസം പരീക്ഷിച്ചിരുന്നു. ഡ്രോണുകള്‍ പരീക്ഷിക്കുന്നതിനെതിരെ ട്രംപ് നേരത്തെ രംഗത്ത് വന്നിരുന്നു. ഈ മുന്നറിയിപ്പുകള്‍ അവഗണിച്ചാണ് റഷ്യ വീണ്ടും ആണവ ശേഷിയുള്ള ആയുധം പരീക്ഷിച്ചത്.
തന്റെ സാമൂഹിക മാധ്യമമായ ട്രൂത്ത് സോഷ്യലിലൂടെയാണ് മൊറൊട്ടോറിയം അവസാനിപ്പിച്ച് ആണവായുധ പരീക്ഷണത്തിനൊരുങ്ങുന്ന വിവരം യു.എസ് പ്രസിഡന്റ് അറിയിച്ചത്. വിനാശകരമായതിനാല്‍ ഇത് ചെയ്യാന്‍ തനിക്ക് ഇഷ്ടമുണ്ടായിട്ടല്ല. പക്ഷേ വേറെ വഴിയില്ലെന്നും കുറിപ്പില്‍ ട്രംപ് പറയുന്നു.
1992 ന് ശേഷം യു.എസ് ഇതുവരെ ആണവായുധ പരീക്ഷണങ്ങള്‍ നടത്തിയിട്ടില്ല. ഈ നീണ്ടകാലത്തെ മൊറൊട്ടോറിയമാണ് ട്രംപ് അവസാനിപ്പിച്ചത്.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള്‍ സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.