പുലിയുടെ ആക്രമണം: വാല്‍പ്പാറയില്‍ വീട്ടുമുറ്റത്ത് കളിച്ചുകൊണ്ടിരുന്ന നാല് വയസുകാരന്‍ കൊല്ലപ്പെട്ടു

വാല്‍പാറ: തമിഴ്നാട് വാല്‍പാറയില്‍ നാല് വയസുകാരനെ പുലി കടിച്ചുകൊലപ്പെടുത്തി. വാല്‍പാറ ആയിപ്പാടി എസ്റ്റേറ്റിലെ തോട്ടംതൊഴിലാളിയുടെ മകന്‍ സൈബുള്‍ ആണ് മരിച്ചത്. വീട്ടുമുറ്റത്ത് കളിച്ചുകൊണ്ടിരുന്ന കുട്ടിയെ പുലി കടിച്ചുകൊണ്ട് പോവുകയായിരുന്നു.

വാല്‍പാറയില്‍ ഇത്തരം സംഭവങ്ങള്‍ തുടര്‍ക്കഥയാകുകയാണെന്ന് നാട്ടുകാര്‍ ആരോപിച്ചു. വാല്‍പാറയിലെ ഈല്‍പാടി എസ്റ്റേറ്റിലെ നാല് വയസുകാരനാണ് പുലിയുടെ ആക്രമണത്തിന് ഇരയായത്. ശനിയാഴ്ച വൈകുന്നേരം ഏഴോടെയാണ് കുട്ടിയെ കാണാനില്ല എന്ന പരാതിയുമായി കുട്ടിയുടെ ബന്ധുക്കള്‍ വനംവകുപ്പ് ഉദ്യോഗസ്ഥരെ സമീപിച്ചത്. പിന്നാലെ പൊലീസും വനംവകുപ്പും നാട്ടുകാരും ചേര്‍ന്ന് കുട്ടിയെ അന്വേഷിച്ചിറങ്ങി.

വനംവകുപ്പ് നടത്തിയ പരിശോധനയില്‍ തേയിലത്തോട്ടത്തിനുള്ളില്‍ നിന്നാണ് കുട്ടിയുടെ മൃതദേഹം കണ്ടെത്തിയത്. പുള്ളിപ്പുലിയാണ് കുട്ടിയെ കടിച്ചുകൊന്നത് എന്ന സ്ഥിരീകരണമാണ് വനംവകുപ്പ് നല്‍കുന്നത്. പോസ്റ്റുമോര്‍ട്ടം നടപടികള്‍ക്കായി മൃതദേഹം വാല്‍പാറ താലൂക്ക് ആശുപത്രിയിലേക്ക് മാറ്റി.