തിരുവനന്തപുരം: പതിനഞ്ചാം കേരള നിയമസഭയുടെ പതിനാറാം സമ്മേളനത്തിന് ഇന്ന് തുടക്കമാകും. നിയമസഭ തിരഞ്ഞെടുപ്പിന് തൊട്ടുമുന്പുള്ള അവസാന സമ്മേളനത്തിനാണ് ഇന്ന് തുടക്കമാകുന്നത്. തിരഞ്ഞെടുപ്പിന് മുന്പ് ഭരണപക്ഷത്തിനും പ്രതിപക്ഷത്തിനും ജനങ്ങള്ക്ക് മുന്നില് തങ്ങളുടെ നിലപാട് മുന്നോട്ടുവെയ്ക്കാനുള്ള വേദിയാകും ഇത്. സര്ക്കാരിന് വേണ്ടി ഗവര്ണര് ഇന്ന് നയപ്രഖ്യാപന പ്രസംഗം നടത്തും.
രാവിലെ 8:45 ന് മുഖ്യമന്ത്രി പിണറായി വിജയനും സ്പീക്കര് എ.എന് ഷംസീറും ചേര്ന്ന് ഗവര്ണറെ സ്വീകരിക്കും. ആദ്യ ദിവസം നയപ്രഖ്യാപന പ്രസംഗം മാത്രമേ ഉണ്ടാകൂ. അന്തരിച്ച സഭാംഗം കാനത്തില് ജമീലയ്ക്ക് അന്ത്യോപചാരമര്പ്പിച്ച് ബുധനാഴ്ച പിരിയും. 22, 27, 28 തിയതികളില് നയപ്രഖ്യാപന പ്രസംഗത്തിനുള്ള നന്ദിപ്രമേയ ചര്ച്ചയാണ്. 29 ന് ധനമന്ത്രി കെ.എന് ബാലഗോപാല് സംസ്ഥാന ബജറ്റ് അവതരിപ്പിക്കും. ജീവനക്കാരുടെയും അധ്യാപകരുടെയും അഷ്വേര്ഡ് പെന്ഷന് സ്കീം ഉള്പ്പെടെ വിവിധ പദ്ധതികളുടെ പ്രഖ്യാപനവും ഉണ്ടാകും.
മാര്ച്ച് 26 ന് സഭ പിരിയും. അതിനിടയില് തിരഞ്ഞെടുപ്പ് പ്രഖ്യാപനം ഉണ്ടായാല് സമ്മേളനം വെട്ടിച്ചുരുക്കും. പാലക്കാട് എംഎല്എ രാഹുല് മാങ്കൂട്ടത്തിലിനെതിരെ സിപിഎമ്മിലെ ഡി.കെ മുരളി നല്കിയ പരാതി സഭ പരിഗണിച്ച് പ്രിവിലേജ് ആന്ഡ് എത്തിക്സ് കമ്മിറ്റിക്ക് വിട്ടേക്കും. കഴിഞ്ഞ സമ്മേളന കാലത്ത് പീരുമേട് എംഎല്എ വാഴൂര് സോമന് അന്തരിച്ചിരുന്നു. പിന്നീട് കൊയിലാണ്ടി എംഎല്എ കാനത്തില് ജമീലയും അന്തരിച്ചു. ലൈംഗിക പീഡന കേസില് ജയിലിലായ പാലക്കാട് അംഗം രാഹുല് മാങ്കൂട്ടത്തിലും സഭയില് എത്തില്ല.
വാർത്തകൾക്ക് 📺 പിന്നിലെ സത്യമറിയാനും വേഗത്തിൽ⌚ അറിയാനും ഞങ്ങളുടെ വാട്ട്സാപ്പ് ചാനലിൽ അംഗമാകൂ 📲
https://whatsapp.com/channel/0029VaAscUeA89MdGiBAUc26
ഇവിടെ കൊടുക്കുന്ന അഭിപ്രായങ്ങള് സീ ന്യൂസ് ലൈവിന്റെത് അല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.