യൂറോപ്പ് ഈ ആഴ്ച: അഞ്ച് നൂറ്റാണ്ടിന് ശേഷം മൊണാക്കോയിൽ പോപ്പ്; കാന്റർബറിയിൽ ചരിത്രം കുറിച്ച് വനിതാ ആർച്ച് ബിഷപ്പ്

ആഴ്ചയുടെ അവസാനത്തിൽ വത്തിക്കാനിൽ നിന്നുള്ള ഏറ്റവും വലിയ വാർത്തയായിരുന്നു പോപ്പ് ലിയോ XIV-ന്റെ മൊണാക്കോ സന്ദർശനം. ഏകദേശം അഞ്ച് നൂറ്റാണ്ടുകൾക്ക് ശേഷം ഒരു പോപ്പ് ഈ ചെറിയ യൂറോപ്യൻ രാജ്യത്ത് എത്തിയത് ചരിത്രപരമായ സംഭവമായി വിലയിരുത്തപ്പെടുന്നു. സമാധാനവും മനുഷ്യജീവിതത്തിന്റെ മഹത്വവും പ്രമേയമാക്കിയ ഈ സന്ദർശനം മാർച്ച് 28-ന് നടന്നു. പ്രിൻസ് അൽബെർട്ട് രണ്ടാമനും പ്രിൻസസ് ഷാർലീനും നൽകിയ ഔദ്യോഗിക സ്വീകരണത്തോടെയാണ് പോപ്പിന്റെ യാത്ര ആരംഭിച്ചത്.

ഇംഗ്ലണ്ടിൽ ആംഗ്ലിക്കൻ സഭയ്ക്ക് ചരിത്രപ്രധാനമായ മാറ്റമുണ്ടായി. മാർച്ച് 25-ന് സാറാ മുള്ളാലിയെ കാന്റർബറി ആർച്ച്‌ബിഷപ്പ് ആയി ഔദ്യോഗികമായി സ്ഥാനാരോഹണം ചെയ്തു. ചർച്ച് ഓഫ് ഇംഗ്ലണ്ടിന്റെ ആദ്യ വനിതാ ആർച്ച്‌ബിഷപ്പ് എന്ന നിലയിൽ അവരുടെ നിയമനം ക്രിസ്തീയ ഐക്യത്തിനും വഴിയൊരുക്കുമെന്നാണ് വിലയിരുത്തൽ. കാന്റർബറി കത്തീഡ്രലിൽ നടന്ന ഗംഭീരമായ ചടങ്ങിൽ പ്രിൻസ് വില്ല്യവും പ്രിൻസസ് കേറ്റും പ്രധാനമന്ത്രി കീർ സ്റ്റാർമറും ഉൾപ്പെടെ 2,000-ത്തിലധികം അതിഥികൾ പങ്കെടുത്തു.

രാഷ്ട്രീയരംഗത്ത് ഇറ്റലിയിൽ പ്രധാനമന്ത്രി ജോർജിയ മെലോണിക്ക് തിരിച്ചടിയുണ്ടായി. നീതിപീഠ പരിഷ്കാരവുമായി (Judicial reform ) ബന്ധപ്പെട്ട ഭരണഘടനാ റഫറണ്ടത്തിൽ ജനങ്ങൾ ഭൂരിപക്ഷത്തോടെ എതിർപ്പ് രേഖപ്പെടുത്തി. “നോ” വോട്ടുകൾ 53.2 ശതമാനവും “യെസ്” 46.8 ശതമാനവുമായിരുന്നു. ഈ ഫലം മെലോണിയുടെ സർക്കാരിന്റെ ജനപ്രീതിക്ക് തിരിച്ചടിയായി വിലയിരുത്തപ്പെടുന്നു.

ജർമ്മനിയിൽ വലതുപക്ഷത്തിന്റെ ഉയർച്ച വീണ്ടും ചർച്ചയായി. മാർച്ച് 22-ന് റൈൻലാൻഡ്-പലാറ്റിനേറ്റ് സംസ്ഥാന തിരഞ്ഞെടുപ്പിൽ AfD പാർട്ടി റെക്കോർഡ് വോട്ട് നേടി — ഏകദേശം 19-20 ശതമാനം. കുടിയേറ്റവും സാമ്പത്തിക പ്രശ്നങ്ങളും തുടർന്നും രാഷ്ട്രീയ ചർച്ചകളുടെ കേന്ദ്രമായി നിലകൊള്ളുന്നു.

സ്വിറ്റ്സർലൻഡിൽ സുരക്ഷാ ആശങ്കകൾ ഉയർന്നു. പുതിയ ആർമി ചീഫ് ബെനഡിക്ട് റൂസ് (Benedikt Roos), രാജ്യത്തിന്റെ എയർ ഡിഫൻസ് സംവിധാനത്തിൽ പോരായ്മകൾ ഉണ്ടെന്ന് മുന്നറിയിപ്പ് നൽകി. ഡ്രോൺ ആക്രമണങ്ങൾ ഉൾപ്പെടെയുള്ള ആധുനിക ഭീഷണികൾക്കെതിരെ മതിയായ പ്രതിരോധം ഇല്ലെന്നാണ് അദ്ദേഹത്തിന്റെ വിലയിരുത്തൽ. മാർച്ച് 27-ന് Euronews റിപ്പോർട്ട് ചെയ്ത ഈ വിവരം യൂറോപ്പിലെ സുരക്ഷാ ചർച്ചകൾ ഒന്നുകൂടി കൂടുതൽ ശക്തമാക്കി.

ഇതിനിടെ, ഇറാൻ-ഇസ്രായേൽ സംഘർഷത്തിന്റെ പ്രതിഫലനങ്ങൾ യൂറോപ്പിലും അനുഭവപ്പെടുന്നുണ്ട്. ഇന്ധനവിലകളിലെ ഉയർച്ചയും സുരക്ഷാ ആശങ്കകളും ജനജീവിതത്തെ ബാധിക്കുന്നതായി വിവിധ നേതാക്കൾ ചൂണ്ടിക്കാട്ടി.

കായികരംഗത്ത് യൂറോപ്പ് സജീവമായിരുന്നു. മാർച്ച് 27-ന് Basel സെന്റ് ജേക്കബ് പാർക്കിൽ നടന്ന സൗഹൃദ ഫുട്ബോൾ മത്സരത്തിൽ സ്വിറ്റ്സർലൻഡ് മൂന്നിനെതിരെ നാലിന് ജർമ്മനിയോട് തോറ്റു. ഫ്ലോറിയൻ വിർട്സിന്റെ മികച്ച പ്രകടനമായിരുന്നു ജർമ്മനിയുടെ വിജയത്തിന് പ്രധാന കാരണം. 2026 ലോകകപ്പ് തയ്യാറെടുപ്പുകളുടെ ഭാഗമായുള്ള ഈ മത്സരം ആവേശകരമായിരുന്നു.

ഈ ആഴ്ച യൂറോപ്പ് സമാധാനത്തിന്റെയും ജനാധിപത്യത്തിന്റെയും സുരക്ഷയുടെയും വിഷയങ്ങളിൽ ഒരുമിച്ച് ചിന്തിക്കാൻ പ്രേരിപ്പിക്കുന്നതായിരുന്നു.