പാർവതി തിരുവോത്ത് 'അമ്മ'യിൽ നിന്നും രാജിവെച്ചു

കൊച്ചി: നടി പാർവതി തിരുവോത്ത് താരസംഘടന 'അമ്മ'യിൽ നിന്നും രാജിവെച്ചു. ഇടവേള ബാബുവിന്റ പരാമർശത്തിൽ പ്രതിഷേധിച്ചാണ് രാജി. ഇടവേള ബാബു 'അമ്മ' ജനറൽ സെക്രട്ടറി സ്ഥാനം രാജി വെക്കണം എന്നും പാർവതി ആവശ്യപ്പെട്ടു. താരസംഘടന നിർമ്മിക്കുന്ന പുതിയ ചിത്രവുമായി ബന്ധപ്പെട്ട ഒരു അഭിമുഖത്തിൽ നടി ഭാവന അഭിനയിക്കുമോ എന്ന ചോദ്യത്തിൻ ഇടവേള ബാബു നൽകിയ മറുപടി വിവാദമായിരുന്നു. രാജിവെച്ചവരും മരിച്ചുപോയവരും ചിത്രത്തിലുണ്ടാകില്ലെന്ന പരാമർശമാണ് വിവാദമായത്. സംഘടന തഴഞ്ഞ ഒരു വനിത അംഗത്തെ മരിച്ചുപോയ ഒരാളുമായി താരതമ്യപ്പെടുത്തികൊണ്ടു പറഞ്ഞ വെറുപ്പുളവാക്കുന്നതും ലജ്ജാവഹവുമായ വാക്കുകൾ ഒരിക്കലും തിരുത്താനാവില്ലെന്നും പാർവ്വതി പ്രതികരിച്ചു. ഫേസ്ബുക്ക് കുറിപ്പിലൂടെയാണ് താരം രാജിക്കാര്യം വെളിപ്പെടുത്തിയത്.