ജറുസലം: ഇസ്രയേലില് ഹമാസിന്റെ റോക്കറ്റ് ആക്രമണത്തില് കൊല്ലപ്പെട്ട ഇടുക്കി സ്വദേശിനി സൗമ്യ സന്തോഷിന്റെ മൃതദേഹം ശനിയാഴ്ച നാട്ടിലെത്തിക്കും. വിദേശകാര്യ സഹമന്ത്രി വി. മുരളീധരന് ഇസ്രയേലിലെ ഇന്ത്യന് സ്ഥാനപതി സഞ്ജീവ് കുമാര് സിഗ്ലയുമായി സംസാരിച്ചു. മൃതദേഹം നാട്ടിലെത്തിക്കാനുള്ള നടപടികള് പൂര്ത്തിയായി. വെള്ളിയാഴ്ച രാത്രി ടെല് അവീവിലെ ബെന് ഗുറിയോണ് രാജ്യാന്തര വിമാനത്താവളത്തില്നിന്ന് പ്രത്യേക വിമാനത്തില് മൃതദേഹം ആദ്യം ഡല്ഹിയിലെത്തിക്കും. സംഘര്ഷം തുടരുന്ന സാഹചര്യത്തില് വിമാനത്താവളത്തിന്റെ പ്രവര്ത്തനം തടസപ്പെട്ടാല് നടപടികള് വൈകാം. ഇസ്രയേല്-പലസ്തീന് സംഘര്ഷത്തിനിടെയാണ് സൗമ്യ സന്തോഷ് കൊല്ലപ്പെട്ടത്.
കഴിഞ്ഞ ഏഴ് വര്ഷമായി ഇസ്രായേലില് കെയര് ടേക്കറായി ജോലി ചെയ്യുകയായിരുന്നു സൗമ്യ. അഷ്കെലോണ് എന്ന സ്ഥലത്തായിരുന്നു ഇവര് താമസിച്ചിരുന്നത്. ഭര്ത്താവുമായി സംസാരിക്കുന്നതിനിടെയാണ് ഷെല്ലാക്രമണത്തിനിരയായത്. 2017ല് ആണ് അവസാനമായി സൗമ്യ നാട്ടിലെത്തിയത്.