തിരുവനന്തപുരം: ന്യൂനപക്ഷ സ്കോളര്ഷിപ്പുമായി ബന്ധപ്പെട്ട ഹൈക്കോടതി വിധിയില് നിയമപരമായ പരിശോധനയും വിദഗ്ധ സമിതിയെ നിയോഗിച്ചുള്ള പഠനവും പ്രായോഗിക നിര്ദ്ദേശങ്ങളും സമന്വയിപ്പിച്ച് തീരുമാനത്തിലെത്താന് സര്വകക്ഷി യോഗത്തില് ധാരണ. ഏതു തരത്തില് മുന്നോട്ടു പോകണമെന്ന് നിയമപരമായ പരിശോധന നടത്തുമെന്ന് മുഖ്യമന്ത്രി പറഞ്ഞു.
വിദഗ്ധ സമിതി പഠനം നടത്തും. നിയമവിദഗ്ധരുമായി ചര്ച്ച ചെയ്യും. ആരോഗ്യകരമായ പ്രായോഗിക നിര്ദ്ദേശങ്ങളും പരിഗണിക്കും. എല്ലാ അര്ത്ഥത്തിലും അഭിപ്രായ സമന്വയം ഉണ്ടാകണമെന്നാണ് സര്ക്കാര് താല്പര്യപ്പെടുന്നത്. ഇന്നത്തേത് ആദ്യത്തെ യോഗമായി കണ്ടാല് മതിയെന്നും വീണ്ടും ചര്ച്ച ചെയ്യാമെന്നും മുഖ്യമന്ത്രി പറഞ്ഞു.
പ്രതിപക്ഷ നേതാവ് വി.ഡി സതീശന്, എ. വിജയരാഘവന് (സിപിഎം.) ശൂരനാട് രാജശേഖരന് (കോണ്ഗ്രസ്), കാനം രാജേന്ദ്രന് (സിപിഐ), സ്റ്റീഫന് ജോര്ജ് (കേരള കോണ്ഗ്രസ് എം), പി.കെ. കുഞ്ഞാലിക്കുട്ടി (മുസ്ലിം ലീഗ്), മാത്യു ടി തോമസ് (ജനതാദള് എസ്), പി.സി ചാക്കോ (എന്സിപി), ഡോ. കെ.സി ജോസഫ് (ജനാധിപത്യ കേരള കോണ്ഗ്രസ്), കാസിം ഇരിക്കൂര് (ഐഎന്എല്), ജോര്ജ് കുര്യന് (ബിജെപി), ഉഴമലയ്ക്കല് വേണുഗോപാല് (കോണ്ഗ്രസ് എസ്), അഡ്വ. വേണുഗോപാലന് നായര് (കേരള കോണ്ഗ്രസ് ബി), ഷാജി കുര്യന് (ആര്എസ്പി ലെനിനിസ്റ്റ്), അനൂപ് ജേക്കബ് (കേരളാ കോണ്ഗ്രസ് ജേക്കബ്), വര്ഗ്ഗീസ് ജോര്ജ്(ലോക് താന്ത്രിക് ജനതാദള്), എ.എ അസീസ് (ആര്എസ്പി) എന്നിവര് യോഗത്തില് സംസാരിച്ചു.