തിരുവനന്തപുരം : സംസ്ഥാനത്ത് സ്ത്രീധനനിരോധന ചട്ടങ്ങളില് ഭേദഗതി വരുത്തി വനിത ശിശുവികസന വകുപ്പ്. എല്ലാ ജില്ലകളിലും ഡൗറി പ്രൊഹിബിഷന് ഓഫീസര്മാരെ നിശ്ചയിച്ച് വനിത ശിശുവികസന വകുപ്പ് ഉത്തരവിറക്കിയതായി ആരോഗ്യ വനിത ശിശുവികസന വകുപ്പ് മന്ത്രി വീണാ ജോര്ജ് അറിയിച്ചു.
വനിത ശിശുവികസന വകുപ്പ് ജില്ലാ ഓഫീസര്മാരെ തല്സ്ഥാനത്ത് നിയമിച്ചാണ് നിയമഭേദഗതി. തിരുവനന്തപുരം, എറണാകുളം, കോഴിക്കോട് ജില്ലകളില് മാത്രമാണ് നിലവില് ഡൗറി പ്രൊഹിബിഷന് ഓഫീസര്മാര് ഉണ്ടായിരുന്നത്. ഇത് സംസ്ഥാനത്ത് എല്ലാ ജില്ലകളിലും ഓഫിസര്മാരെ നിയമിച്ചു. ജില്ലാതലത്തിലെ പ്രൊഹിബിഷന് ഓഫീസര്മാരുടെ ആദ്യഘട്ട പരിശീലനം പൂര്ത്തിയാക്കിയിട്ടുണ്ട്.
വനിതാ ശിശുവികസന വകുപ്പ് ഡയറക്ടറെ ചീഫ് ഡൗറി പ്രൊഹിബിഷന് ഓഫീസറായും നിയമിച്ചു. സ്ത്രീധനവുമായി ബന്ധപ്പെട്ട പരാതികളില് സ്ത്രീകളെ സഹായിക്കുന്നതിനായി സന്നദ്ധ സംഘടനകളുടെ താത്പര്യപത്രവും ക്ഷണിച്ചു. അതോടൊപ്പം ബോധവത്ക്കരണ പ്രവര്ത്തനങ്ങളും ശക്തമാക്കി. വിദ്യാര്ത്ഥികള്ക്കായി കോളേജുകള്, എന്.എസ്.എസ്. എന്നിവരുമായി അവബോധ ക്ലാസുകളും സംഘടിപ്പിച്ചു വരുന്നതായും മന്ത്രി വ്യക്തമാക്കി.