തിരുവനന്തപുരം: നിലമേല് സ്വദേശിനി വിസ്മയയുടെ മരണത്തില് ഭര്ത്താവ് കിരണ് കുമാറിനെ സര്ക്കാര് സര്വീസില്നിന്ന് പിരിച്ചുവിട്ടു. ഗതാഗത വകുപ്പില് അസിസ്റ്റന്റ് മോട്ടോര് വെഹിക്കിള് ഇന്സ്പെക്ടറായിരുന്നു കിരണ് കുമാര്.
ഗതാഗത മന്ത്രി ആന്റണി രാജു വാര്ത്താസമ്മേളനം വിളിച്ചാണ് ഇക്കാര്യമറിയിച്ചത്. കേരളത്തിന്റെ ചരിത്രത്തില് ആദ്യമായാണ് സ്ത്രീധന പീഡന മരണക്കേസില് പ്രതിയായ ഒരു സര്ക്കാര് ഉദ്യോഗസ്ഥനെ സര്വീസില് നിന്നും പിരിച്ചു വിടുന്നത്.
സര്വീസ് ചട്ടം അനുസരിച്ചാണ് നടപടി. കിരണിന് ഇനി സര്ക്കാര് സര്വീസില് ജോലി ലഭിക്കില്ല. പെന്ഷനും അര്ഹതയുണ്ടാവില്ല. ജൂണ് 21 നാണ് വിസ്മയയെ കൊല്ലം പോരുവഴിയിലെ ഭര്തൃവീട്ടില് തൂങ്ങി മരിച്ചനിലയില് കണ്ടെത്തിയത്. ഭര്ത്താവ് കിരണിനെതിരെ സ്ത്രീധന പീഡനത്തിനും ഗാര്ഹിക പീഡനത്തിനും കേസെടുത്തിരുന്നു. അന്വേഷണം പൂര്ത്തിയാകും മുന്പ് പിരിച്ചു വിടുന്നത് അത്യപൂര്വ നടപടിയാണ്.
ഇന്ത്യന് ശിക്ഷാ നിയമത്തിലെ 304 ബി (സ്ത്രീധന പീഡന മരണം) , 498 എ (കൂടുതല് സ്ത്രീധനം ആവശ്യപ്പെട്ടുള്ള ശാരീരിക, മാനസിക പീഡനം) എന്നീ കുറ്റങ്ങളാണ് കിരണ് കുമാറിനെതിനെ എഫ്ഐആറില് ചുമത്തിയിട്ടുള്ളത്.