ലോകത്തെ ഏറ്റവും വലിയ വർണ ജലധാരയാകാനൊരുങ്ങി ദുബായ് പാം ജുമൈറയിലെ, ദി പാം ഫൌണ്ടെയന്‍ ഇന്ന് സന്ദർശകർക്കായി തുറന്നുകൊടുക്കും. ദുബായിലെ ഏക ബഹുവ‍ർണ ജലധാരയുടെ ഗിന്നസ് ശ്രമവും ഇന്നാണ് നടക്കുക. ജുമൈറെ വാട്ടർ ഫ്രണ്ട് ഭാഗത്ത് സ്ഥാപിച്ചിട്ടുളള, 14,000 ചതുരശ്ര അടി വിസ്തീര്‍ണമുള്ള ഈ ജലധാരയില്‍ സൂപ്പര്‍ ഷൂട്ടര്‍ 105 മീറ്ററില്‍ ഉയരത്തിലേക്ക് ജലം വർഷിക്കും. മൂവായിരത്തിലധികം എല്‍ഇഡി ലൈറ്റുകള്‍ തെളിയുന്നതോടെ വർണപ്രപഞ്ചമാകും ജലധാര സന്ദർശകർക്ക് സമ്മാനിക്കുക. വൈകീട്ട് നാലുമുതൽ രാത്രി 12 വരെ നടക്കുന്ന ഉദ്ഘാടന ചടങ്ങിലേക്ക് നേരത്തെ രജിസ്ട്ര‍ർ ചെയ്തവ‍ർക്ക് പ്രവേശനം സൗജന്യമാണ്. വെടിക്കെട്ടും, ഡിജെയും ഡാന്‍സും ഇതോടനുബന്ധിച്ച് നടക്കും.പാം ഫൗണ്ടെയ്നില്‍ 20 ഷോകള്‍ ഉണ്ടായിരിക്കും.