കോഴിക്കോട്: നിപാ സമ്പര്ക്കപ്പട്ടികയിലുള്ള അഞ്ചുപേരുടെ പരിശോധനാ ഫലം കൂടി നെഗറ്റീവ്. ആരോഗ്യമന്ത്രി വീണാ ജോര്ജാണ് ഇക്കാര്യം അറിയിച്ചത്. ഇതില് നാലെണ്ണം എന്.ഐ.വി. പുണെയിലും ഒരെണ്ണം കോഴിക്കോട് മെഡിക്കല് കോളേജില് പ്രത്യേകമായി സജ്ജമാക്കിയ ലാബിലുമാണ് പരിശോധിച്ചത്. ഇതോടെ 73 പേരുടെ സാമ്പിളുകളാണ് നെഗറ്റീവാണെന്ന് കണ്ടെത്തിയിരിക്കുന്നത്.
സമ്പര്ക്കപ്പട്ടികയില് 274 പേരാണുണ്ടായിരുന്നത്. അതില് 149 ആരോഗ്യ പ്രവര്ത്തകരാണ്. മറ്റ് ജില്ലകളിലുള്ളവര് 47 പേരാണ്.
അതേസമയം, കോഴിക്കോട് ജില്ലയിലെ ചാത്തമംഗലം പഞ്ചായത്തില് കുട്ടിയുടെ വീടിന്റെ മൂന്ന് കിലോമീറ്റര് ചുറ്റളവിലുള്ള കണ്ടെയ്ന്മെന്റ് സോണിന്റെ പരിധിയില് വരുന്ന എല്ലാ വാര്ഡുകളിലും ഹൗസ് ടു ഹൗസ് സര്വേ നടത്തി. ഈ കാലഘട്ടത്തില് അസ്വാഭാവികമായ പനി, അസ്വാഭാവിക മരണങ്ങള് എന്നിവ ഈ പ്രദേശങ്ങളില് ഉണ്ടായിട്ടുണ്ടോ എന്നറിയാന് കൂടിയാണ് ഹൗസ് ടു ഹൗസ് സര്വേ നടത്തിയത്. നിലവില് ആര്ക്കെങ്കിലും രോഗലക്ഷണങ്ങളുണ്ടോ, ഈ കേസുമായി ബന്ധമുണ്ടോ, മുമ്പ് സമാനമായ ഇത്തരം കേസുകള് ഉണ്ടായിട്ടുണ്ടോ എന്നറിയാനും ശ്രമിച്ചതായി ആരോഗ്യമന്ത്രി പറഞ്ഞു.