മുംബൈ: യു.എസിലെ പ്രമുഖ പെട്രോള്‍-ഭക്ഷ്യ ശൃംഖലയായ 7-ഇലവന്‍ കണ്‍വീനിയന്‍സ് സ്റ്റോറുകള് ഇന്ത്യയില്‍ ആരംഭിക്കാനൊരുങ്ങി മുകേഷ് അംബാനിയുടെ റിലയന്‍സ് റീട്ടെയിസ്. 7-ഇലവന്റെ ഇന്ത്യയിലെ ആദ്യത്തെ സ്റ്റോര്‍ ഈ മാസം ഒന്‍പതിന് മുംബൈയിലെ അന്ധേരി ഈസ്റ്റില്‍ ആരംഭിക്കും. തുടര്‍ന്ന് സമീപ വ്യാപാര മേഖലകളിലും 7 -ഇലവന്‍ സ്റ്റോറുകള് പ്രവര്‍ത്തനം ആരംഭിക്കുമെന്നാണ് വിവരം. ടെക്‌സാസ് ആസ്ഥാനമായുള്ള 7-ഇലവന്‍ ശൃംഖലയ്ക്ക് 18 രാജ്യങ്ങളിലായി 77,000 സ്റ്റോറുകളുണ്ട്.
ഇന്ത്യന്‍ റീട്ടെയിലറായ ഫ്യൂച്ചര്‍ ഗ്രൂപ്പുമായുള്ള കരാര്‍ അവസാനിപ്പിച്ച് ദിവസങ്ങള്‍ക്കകമാണ് 7-ഇലവന്റെ പുതിയ നീക്കം. കഴിഞ്ഞ ദിവസമാണ് ഫ്യൂച്ചര്‍ ഗ്രൂപ്പും 7-ഇലവനുമായുള്ള കരാര്‍ പരസ്പര ധാരണ പ്രകാരം ഇരു കമ്പനികളും ചേര്‍ന്ന് റദ്ദ് ചെയ്തത്.
ഗ്രേറ്റര്‍ മുംബൈ വാണിജ്യ മേഖലകളിലുടനീളമായിരിക്കും ആദ്യം സ്റ്റോറുകള് തുറക്കുക. അവശ്യ വസ്തുക്കളും പാനീയങ്ങള്‍, ലഘുഭക്ഷണങ്ങള്‍, പലഹാരങ്ങള്‍ എന്നിവയുമാണ് 7-ഇലവന്‍ സ്റ്റോറുകളിലൂടെ വിറ്റഴക്കുന്നത്.
പറഞ്ഞ സമയത്തിനുള്ളില്‍ 7-ഇലവന്‍ സ്റ്റോറുകള് ആരംഭിക്കാന്‍ സാധിക്കാത്തതും ഫ്രാഞ്ചെയ്സി ഫീസിനത്തില്‍ നല്‍കേണ്ട തുക കണ്ടെത്താനാവാത്തതും ആയിരുന്നു ഫ്യൂച്ചര്‍ ഗ്രൂപ്പിന്റെ പിന്മാറ്റത്തിനുള്ള കാരണം. 2019ല്‍ ആയിരുന്നു ഇരു കമ്പനികളും കരാറിലെത്തിയത്.
21 ബില്യണ്‍ ഡോളറിന്റെ വിറ്റുവരവുള്ള റിലയന്‍സ് റീട്ടെയില്‍ വെഞ്ച്വേഴ്‌സ് ഇന്ത്യയിലെ ഏറ്റവും വലിയ റീട്ടെയിലറാണ്.