തിരുവനന്തപുരം: ഖാദി ബോര്ഡ് വൈസ് ചെയര്മാന് സ്ഥാനത്തേക്ക് ചെറിയാന് ഫിലിപ്പിനെ നിയമിച്ചുള്ള ഉത്തരവ് റദ്ദാക്കി. ദുരന്ത നിവാരണം സംബന്ധിച്ച് മുഖ്യമന്ത്രി പിണറായി വിജയനെതിരായ ചെറിയാന് ഫിലിപ്പിന്റെ വിമര്ശനമാണ് ഉത്തരവ് അതിവേഗം റദ്ദാക്കാന് കാരണം എന്നാണ് സൂചന. എന്നാൽ പദവി വേണ്ടെന്ന് ചെറിയാന് നേരത്തെ വ്യക്തമാക്കിയിരുന്നു.
ഭരണകൂടം നടത്തുന്ന മഴക്കെടുതി ദുരന്ത നിവാരണത്തെ വിമര്ശിച്ച് ഇന്നലെയാണ് ചെറിയാന് ഫിലിപ്പ് ഫേസ്ബുക്ക് പോസ്റ്റിട്ടത്. ഭരണാധികാരികള് ദുരന്തനിവാരണത്തിന് വേണ്ടത്ര ശ്രദ്ധ നല്കുന്നില്ലെന്ന് ചെറിയാല് ഫിലിപ്പ് കുറ്റപ്പെടുത്തി. ഭരണാധികാരികള് ദുരന്ത നിവാരണത്തില് വേണ്ടത്ര ശ്രദ്ധിക്കാതെ ദുരന്തം വന്ന ശേഷം ക്യാമ്പിൽ പോയി കണ്ണീര് പൊഴിക്കുന്നത് ജനവഞ്ചനയാണെന്നും അദ്ദേഹം വിമര്ശിച്ചു.
പുസ്തക രചനയുടെ തിരക്കിലായതിനാല് ഖാദി ബോര്ഡ് വൈസ് ചെയര്മാന് സ്ഥാനം ഏറ്റെടുക്കാനാവില്ലെന്നാണ് ചെറിയാന് ഫിലിപ്പ് നേരത്തെ അറിയിച്ചിരുന്നത്. അടിയൊഴുക്കുകള് എന്ന ആധുനിക രാഷ്ട്രീയ ചരിത്രരചനയില് വ്യാപൃതനായതിനാല് ഖാദി ബോര്ഡ് വൈസ് ചെയര്മാന് സ്ഥാനം ഏറ്റെടുക്കുന്നില്ലെന്നാണ് ചെറിയാന് ഫിലിപ്പ് ഫേസ്ബുക്ക് പോസ്റ്റില് പറയുന്നത്. ഖാദി വില്പ്പനയും ചരിത്രരചനയും ഒരുമിച്ചു നടത്താന് പ്രയാസമാണെന്ന് അദ്ദേഹം ഫേസ്ബുക്കില് കുറിച്ചിരുന്നു.