കൊച്ചി: സംസ്ഥാനത്ത് 175 പുതിയ മദ്യവില്പന ശാലകള് കൂടി ആരംഭിക്കാനൊരുങ്ങി സര്ക്കാര്. പുതിയ മദ്യശാലകള് പരിഗണനയിലാണെന്ന് സര്ക്കാര് ഹൈക്കോടതിയില് വ്യക്തമാക്കി. ബെവ്കോയുമായി ബന്ധപ്പെട്ട കോടതിയലക്ഷ്യ ഹര്ജി പരിഗണിക്കുമ്പോഴാണ് സര്ക്കാര് ഇക്കാര്യം അറിയിച്ചത്. ഇതു സംബന്ധിച്ച ബെവ്കോയുടെ ശുപാര്ശ എക്സൈസ് വകുപ്പിന്റെ പരിഗണനയിലാണ്. നിലവിലുള്ള മദ്യശാലകള്ക്കെതിരെ എതിര്പ്പുകള് ശക്തമാകുന്നതിനിടെയാണ് പുതിയ നീക്കം.
വാക്ക് ഇന് മദ്യവില്പന ശാലകള് തുടങ്ങണമെന്ന കോടതിയുടെ നിര്ദേശവും സജീവ പരിഗണനയിലുണ്ടെന്നും സര്ക്കാര് കോടതിയെ അറിയിച്ചു. എന്നാല് പൊതുജനങ്ങള്ക്ക് ഉണ്ടാകുന്ന ബുദ്ധിമുട്ടുകള് കണ്ടില്ലെന്നു നടിക്കാനാകില്ലെന്ന് ഹൈക്കോടതി ആവര്ത്തിച്ചു.
കഴിഞ്ഞ തവണ ഹര്ജി പരിഗണിക്കവെ ക്യൂ നില്ക്കാതെ മദ്യം വാങ്ങി തിരികെ പോകാന് കഴിയുന്ന തരത്തില് വാക്കിങ് ഷോപ്പ് സംവിധാനം തുടങ്ങുന്നത് സംബന്ധിച്ച് നിലപാടറിയിക്കാന് കോടതി സര്ക്കാരിനോട് ആവശ്യപ്പെട്ടിരുന്നു. ബെവ്കോ ഔട്ലെറ്റുകള് പരിഷ്ക്കരിക്കുന്നതില് നയപരമായ മാറ്റം അനിവാര്യമാണെന്നും കോടതി ചൂണ്ടിക്കാട്ടിയിരുന്നു.
ജസ്റ്റിസ് ദേവന് രാമചന്ദ്രന്റെ സിംഗിള് ബെഞ്ചാണ് കേസ് പരിഗണിച്ചത്. കേരളത്തില് പുതിയൊരു മദ്യ സംസ്കാരം നടപ്പാക്കാനാണോ സര്ക്കാര് ശ്രമമെന്ന് ചിന്തിക്കേണ്ടിയിരിക്കുന്നു.