വയനാട്: വയനാട് ജില്ലയില് നോറോ വൈറസ് സ്ഥിരീകരിച്ചു. രോഗം പിടിപെട്ടത് രോഗം പിടിപെട്ടത് പൂക്കോട് വെറ്ററിനറി കോളേജ് വിദ്യാര്ത്ഥിനികള്ക്കാണ്. വിദ്യാര്ത്ഥികളില് നിന്ന് ശേഖരിച്ച സാമ്പിളുകൾ ആലപ്പുഴ നാഷണല് വൈറോളജി ഇന്സ്റ്റിറ്റിയൂട്ടില് പരിശോധിച്ചപ്പോഴാണ് നോറോ വൈറസ് സാന്നിധ്യം കണ്ടെത്തിയത്.വെറ്ററിനറി കോളേജ് വനിതാ ഹോസ്റ്റലിലെ വിദ്യാര്ത്ഥികള്ക്കിടയില് വയറിളക്കവും ഛര്ദ്ദിയും റിപ്പോര്ട്ട് ചെയ്തതിനെ തുടര്ന്നാണ് ആരോഗ്യ വകുപ്പിന്റെ നേത്യത്വത്തില് വിദഗ്ദ സംഘം സ്ഥലം സന്ദര്ശിച്ച് വിദ്യാര്ത്ഥികളുടെ മലം പരിശോധനയ്ക്കായി അയച്ചത്.
ജില്ലയുടെ വിവിധ ഭാഗങ്ങളില് സമാനമായ രോഗ ലക്ഷണങ്ങള് റിപ്പോര്ട്ട് ചെയ്യപ്പെടുന്നതിനാല് പ്രതിരോധ പ്രവര്ത്തനങ്ങള് ഊര്ജിതപ്പെടുത്തിയിട്ടുണ്ടെന്നും പൊതുജനങ്ങള് ജാഗ്രത പാലിക്കണമെന്നും ജില്ലാ മെഡിക്കല് ഓഫീസര് ഡോ. ആര് രേണുക അറിയിച്ചു. ആരോഗ്യ വകുപ്പിന്റെ നേതൃത്വത്തില് വിവിധ പ്രദേശങ്ങളിലായി ബോധവത്കരണ പരിപാടികളും ആസൂത്രണം ചെയ്യുന്നുണ്ട്.
വയറിളക്കം, വയറുവേദന, ഛര്ദ്ദി, മനംമറിച്ചില്, പനി, തലവേദന, ശരീരവേദന തുടങ്ങിയവയാണ് നോറോ വൈറസ് രോഗ ലക്ഷണങ്ങള്. ഛര്ദ്ദി, വയറിളക്കം എന്നിവ മൂര്ച്ഛിച്ചാല് നിര്ജലീകരണം സംഭവിക്കുകയും രോഗം ഗുരുതരാവസ്ഥയിലേക്ക് മാറുകയും ചെയ്യും.
മലിനമായ ജലത്തിലൂടെയും, ഭക്ഷണത്തിലൂടെയുമാണ് രോഗം പകരുന്നത്. രോഗ ബാധയേറ്റ വ്യക്തികളുമായി നേരിട്ടുള്ള സമ്പർക്കത്തിലൂടെയും രോഗം പടരും. രോഗബാധിതനായ വ്യക്തിയില് നിന്ന് പുറത്തെത്തുന്ന ശ്രവങ്ങളിലൂടെ വൈറസ് പ്രതലങ്ങളില് തങ്ങി നില്ക്കുകയും അവയില് സ്പര്ശിക്കുന്നവരുടെ കൈകളിലേക്ക് പടരുകയും ചെയ്യും. വൈറസ് ബാധിച്ച് രണ്ട് ദിവസങ്ങള്ക്കുള്ളില് ലക്ഷണങ്ങള് പ്രകടമാകും. വൈറസ് ബാധിതര് വീട്ടിലിരിക്കേണ്ടതും, ഒആര്എസ് ലായനി, തിളപ്പിച്ചാറിയ വെള്ളം എന്നിവ നന്നായി കുടിക്കേണ്ടതുമാണെന്ന് ജില്ലാ മെഡിക്കല് ഓഫീസര് അറിയിച്ചു.