കല്പ്പറ്റ: വയനാട് വെറ്ററിനറി സര്വകലാശാലയിലെ 13 വിദ്യാര്ഥികള്ക്ക് നോറോ വൈറസ് സ്ഥിരീകരിച്ചു. ആശങ്കവേണ്ടെന്നും മുന് കരുതല് നടപടി എടുത്തെന്നും ആരോഗ്യമന്ത്രി വീണാ ജോര്ജ് പറഞ്ഞു.
പ്രതിരോധ പ്രവര്ത്തനങ്ങള് ഊര്ജിതമാക്കാന് നിര്ദേശം നല്കിയതായും മന്ത്രി പറഞ്ഞു. നിലവില് ആശങ്കപ്പെടേണ്ട സാഹചര്യമില്ലെങ്കിലും എല്ലാവരും ജാഗ്രത പാലിക്കണമെന്ന് മന്ത്രി കൂട്ടിച്ചേർത്തു. സൂപ്പര് ക്ലോറിനേഷന് ഉള്പ്പെടെയുള്ള പ്രവര്ത്തനങ്ങള് നടന്നു വരുന്നു. കുടിവെള്ള സ്രോതസുകള് ശുചിയാണെന്ന് ഉറപ്പ് വരുത്തേണ്ടതാണ്.
കൃത്യമായ പ്രതിരോധത്തിലൂടെയും ചികിത്സയിലൂടെയും രോഗം വേഗത്തില് ഭേദമാകുന്നതാണ്. അതിനാല് രോഗത്തെപ്പറ്റിയും അതിന്റെ പ്രതിരോധ മാര്ഗങ്ങളെപ്പറ്റിയും എല്ലാവരും അറിഞ്ഞിരിക്കേണ്ടതാണെന്നും മന്ത്രി ഓർമിപ്പിച്ചു.