തിരുവനന്തപുരം: ആരോഗ്യ മേഖലയില് ഇ ഗവേണന്സ് സേവനങ്ങള് നല്കുന്നതിനായി ആരോഗ്യ വകുപ്പ് പുതിയ പോർട്ടൽ സംവിധാനത്തിന് രൂപം നല്കിയ. ഇ ഹെല്ത്ത് വെബ് പോര്ട്ടല് (https://ehealth.kerala.gov.in) വഴി ഇനി മുതൽ ആശുപത്രികളിലേക്ക് അപ്പോയ്മെന്റ് എടുക്കാം.
ഇ ഹെല്ത്ത് നടപ്പിലാക്കിയിട്ടുള്ള ആശുപത്രികളിലേക്കാണ് മുന്കൂട്ടി അപ്പോയ്മെന്റ് എടുക്കാന് സാധിക്കുക. 300ല് പരം ആശുപത്രികളില് മുന്കൂട്ടിയുള്ള ഓണ്ലൈന് ബുക്കിംഗ് വഴി നിശ്ചിത തീയതിയിലും സമയത്തും ഡോക്ടറുടെ സേവനം ലഭിക്കും. ഒ.പി ടിക്കറ്റുകള്, ടോക്കണ് സ്ലിപ്പുകള് എന്നിവയുടെ ഓണ്ലൈന് പ്രിന്റിംഗ് സാധ്യമാകും. ആശുപത്രി വഴിയുള്ള അപ്പോയ്മെന്റ് അതുപോലെ തുടരുമെന്നും ആരോഗ്യമന്ത്രി വീണാ ജോര്ജ് അറിയിച്ചു.
ഒരാളുടെ ആരോഗ്യ സംബന്ധമായ എല്ലാ വിവരങ്ങളും ഉള്ക്കൊള്ളുന്ന ഒരു ഏകീകൃത തിരിച്ചറിയല് നമ്പരും ഈ വെബ്പോര്ട്ടല് വഴി ലഭ്യമാകും. ആശുപത്രിയെക്കുറിച്ചുള്ള വിവരങ്ങള്, ലഭ്യമായ സേവനങ്ങള്, ചികിത്സാ സമയം, ലാബ് ടെസ്റ്റുകളെക്കുറിച്ചുള്ള വിവരങ്ങള് എന്നിവയും പോര്ട്ടല് വഴി അറിയാന് സാധിക്കും.