ദുബായ്: വിദേശ കറന്‍സിയുമായുളള ഇന്ത്യന്‍ രൂപയുടെ വിനിമയ മൂല്യം കരുത്താ‍ർജ്ജിക്കുന്നു. യുഎഇ ദിർഹവുമായുളള വിനിമയ മൂല്യം 20 രൂപ 8 പൈസയിലേക്കെത്തി. ഇനിയും രൂപ കരുത്താ‍ർജ്ജിക്കുമെന്ന സൂചനയാണ് വിപണി നല്‍കുന്നത്. യുഎഇ ദി‍ർഹവുമായി 19 രൂപ 90 പൈസയിലേക്ക് രൂപയെത്തുമെന്നാണ് വിലയിരുത്തല്‍.
ഒരു വേള 20 രൂപ 80 പൈസയിലേക്കെത്തിയ ശേഷമാണ്, 2021 അവസാനിക്കാന്‍ 10 ദിവസമുളളപ്പോള്‍ വീണ്ടും കരുത്താർജ്ജിച്ചു തുടങ്ങുന്നത്. 2022-23 വ‍ർഷത്തെ കേന്ദ്ര ബജറ്റ് ഫെബ്രുവരിയിലുണ്ടാകുമെന്ന സൂചനയാണ് രൂപയുടെ മൂല്യത്തില്‍ വർദ്ധനവുണ്ടാകാനുണ്ടായ പ്രധാന കാരണങ്ങളില്‍ ഒന്ന്. ഉത്തർ പ്രദേശ് ഉള്‍പ്പടെ അഞ്ച് സംസ്ഥാനങ്ങളില്‍ വരാനിരിക്കുന്ന തെരഞ്ഞെടുപ്പും ഫലവും രൂപയുടെ മൂല്യത്തില്‍ നിർണായകമായേക്കാം.