കോഴിക്കോട്: പഠനയാത്രക്ക് കോഴിക്കോട്ടെത്തിയ രണ്ടു കുട്ടികള്ക്ക് രാസലായനി കുടിച്ച് പൊള്ളലേറ്റു. കാസര്കോട് തൃക്കരിപ്പൂര് ആയട്ടി സ്വദേശികളായ മുഹമ്മദ് (14), സാബിദ് (14) എന്നിവര്ക്കാണു പൊള്ളലേറ്റത്. കോഴിക്കോട് വരക്കല് ബീച്ചില് ഉപ്പിലിട്ടതു വില്ക്കുന്ന പെട്ടിക്കടയില് നിന്നാണ് ഇവര് രാസലായനി കുടിച്ചത്. ഉപ്പിലിട്ട നെല്ലിക്ക കഴിച്ച് എരിവു തോന്നിയപ്പോള് അടുത്തുകണ്ട കുപ്പിയില് വെള്ളമാണെന്നു കരുതി കുടിക്കുകയായിരുന്നു.
കുടിച്ച കുട്ടിയുടെ വായ പൊള്ളി. ഈ കൂട്ടിയുടെ ഛര്ദ്ദില് ദേഹത്തുപറ്റിയ മറ്റൊരുകുട്ടിക്കും പൊള്ളല് എല്ക്കുകയായിരുന്നു. ഇവരെ കോഴിക്കോട് മെഡിക്കല് കോളജില് ചികിത്സക്കു വിധേയമാക്കിയ ശേഷം നാട്ടിലേക്കു കൊണ്ടു പോയി. നിലവില് ഇവര് കാസര്കോട് ചികിത്സയിലാണുള്ളത്.
പഠന യാത്രയുടെ ഭാഗമായാണ് ഇവര് കോഴിക്കോട്ട് എത്തിയത്. ഉപ്പിലിട്ടത് വേഗം പാകമാകാന് ആഡിഡ് അടക്കമുള്ള രാസവസ്തുക്കള് ഉപയോഗിക്കുന്നത് നഗരത്തില് വ്യാപകമാണെന്ന് പരാതിയുണ്ട്. അധികൃതര് ഒരു രീതിയിലുള്ള പരിശോധനയും നടത്തുന്നില്ലെന്നതും ഇത്തരക്കാര്ക്ക് സഹായകമാണ്.