തിരുവനന്തപുരം: കെഎസ്ഇബി അഴിമതി ആരോപണത്തില് മുന് വൈദ്യുതി മന്ത്രി എംഎം മണിക്കെതിരെ വീണ്ടും ആരോപണവുമായി പ്രതിപക്ഷ നേതാവ് വിഡി സതീശന്. കെഎസ്ഇബി ഭൂമി കൈമാറ്റത്തിലൂടെ എംഎം മണിയുടെ ബന്ധുക്കള്ക്കും ഭൂമി ലഭിച്ചിട്ടുണ്ടെന്നും അത് തെളിയിക്കുന്ന രേഖകളുണ്ടെന്നും സതീശന് വ്യക്തമാക്കി.
നൂറ് കണക്കിന് ഭൂമിയാണ് ചട്ടവിരുദ്ധമായി കൈമാറിയത്. വൈദ്യുത ബോര്ഡില് സാമ്പത്തിക പ്രതിസന്ധിയുണ്ടായത് ഇത്തരത്തിലുള്ള അഴിമതിയെത്തുടര്ന്നാണെന്നും അദ്ദേഹം കുറ്റപ്പെടുത്തി. അതിനാല് വൈദ്യുതി ചാര്ജ് വര്ധന നടപ്പാക്കി ജനങ്ങളെ ബുദ്ധിമുട്ടിലാക്കരുത്. കെഎസ്ഇബി ഹൈഡല് ടൂറിസം പദ്ധതിയിലെ ഭൂമി കൈമാറ്റം നിയമ വിരുദ്ധമായിട്ടാണെന്ന് റവന്യൂ വകുപ്പ് തന്നെ പറഞ്ഞു. അതുകൊണ്ട് ഭൂമി കൈമാറ്റം റദ്ദാക്കി സമഗ്രമായ അന്വേഷണം നടത്താന് തയ്യാറാകണമെന്നും പ്രതിപക്ഷ നേതാവ് ആവശ്യപ്പെട്ടു.
ഒന്നാം പിണറായി സര്ക്കാരിന്റെ കാലത്ത് വൈദ്യുതി ബോര്ഡില് ക്രമക്കേടുണ്ടായെന്ന കെഎസ്ഇബി ചെയര്മാന്റെ ആരോപണത്തെ തുടര്ന്ന് പ്രതിപക്ഷം രൂക്ഷ വിമര്ശനങ്ങളാണ് ഉന്നയിക്കുന്നത്. വൈദ്യുതി ബോര്ഡില് കഴിഞ്ഞ അഞ്ചര വര്ഷമായി നടക്കുന്നത് കടുത്ത അഴിമതിയാണ്. ഈ ആരോപണങ്ങള്ക്ക് മറുപടി പറയാനുള്ള ഉത്തരവാദിത്വം സര്ക്കാരിനുണ്ടെന്നും പ്രതിപക്ഷം ആവര്ത്തിച്ച് വ്യക്തമാക്കുന്നു.