തിരുവനന്തപുരം: ഉന്നത വിദ്യാഭ്യാസ രംഗത്ത് മികവ് പ്രകടിപ്പിക്കുന്ന വിദ്യാര്ഥികള്ക്ക് സംസ്ഥാന സര്ക്കാരിന്റെ കൈത്താങ്ങ്. വിവിധ സര്വകലാശാലകളില് 2020-21 വിദ്യാഭ്യാസവര്ഷത്തില് പഠിച്ചിറങ്ങിയ, സാമ്പത്തികമായി പിന്നാക്കം നില്ക്കുന്ന കുടുംബങ്ങളില് നിന്നുള്ള പ്രതിഭാധനരായ ആയിരം വിദ്യാര്ത്ഥികള്ക്ക് ഒരുലക്ഷം രൂപ വീതം നല്കുന്ന പദ്ധതി ബുധനാഴ്ച്ച ഉദ്ഘാടനം ചെയ്യും. 'മുഖ്യമന്ത്രിയുടെ വിദ്യാര്ത്ഥിപ്രതിഭാ പുരസ്കാരം' മുഖ്യമന്ത്രി പിണറായി വിജയന് സമ്മാനിക്കുമെന്ന് മന്ത്രി ഡോ. ആര് ബിന്ദു പറഞ്ഞു.
രണ്ടര ലക്ഷം രൂപയില് കുറവ് വാര്ഷിക കുടുംബ വരുമാനമുള്ള ആയിരം വിദ്യാര്ത്ഥികളെ തിരഞ്ഞെടുത്താണ് ഒരു ലക്ഷം രൂപയും പ്രശസ്തിപത്രവും സമ്മാനിക്കുന്നത്. ഓരോ സര്വകലാശാലയിലും വിവിധ പഠന വിഷയങ്ങളില് ഏറ്റവും ഉയര്ന്ന മാര്ക്കോടെ ബിരുദം നേടിയിറങ്ങിയവര്ക്ക്, ലഭിച്ച മാര്ക്കിന്റെ അടിസ്ഥാനത്തിലാണ് പുരസ്കാരം. രാജ്യത്തുതന്നെ ആദ്യമായാണ് ഇങ്ങനെയൊരു പദ്ധതി നടപ്പാക്കുന്നതെന്നും മന്ത്രി പറഞ്ഞു.
ബുധനാഴ്ച്ച വൈകിട്ട് ആറുമണിക്ക് കേരള സര്വ്വകലാശാലാ സെനറ്റ് ഹാളിലാണ് ചടങ്ങ്. മന്ത്രി കെ.എന്. ബാലഗോപാല് മുഖ്യപ്രഭാഷണം നിര്വഹിക്കും. വി.കെ. പ്രശാന്ത് എംഎല്എ, മേയര് ആര്യാ രാജേന്ദ്രന്, കേരള സര്വകലാശാല വൈസ് ചാന്സലര് ഡോ. വി.പി. മഹാദേവന് പിള്ള എന്നിവര് പങ്കെടുക്കും.