തിരുവനന്തപുരം: പിങ്ക് പൊലീസ് എട്ടു വയസുകാരിയെ അപമാനിച്ച സംഭവത്തില് നഷ്ടപരിഹാരം നല്കേണ്ടതല്ലേയെന്ന് സര്ക്കാരിനോട് ഹൈക്കോടതി ഡിവിഷന് ബഞ്ച്. നഷ്ടപരിഹാരം നല്കാന് പൊലീസുകാരിക്കാണ് ബാധ്യതയെന്ന് സര്ക്കാര് വ്യക്തമാക്കുകയായിരുന്നു. ജസ്റ്റിസുമാരായ പി ബി സുരേഷ് കുമാര്, സി എസ് സുധ എന്നിവരടങ്ങുന്ന ഡിവിഷന് ബഞ്ചാണ് അപ്പീല് ഹര്ജി പരിഗണിച്ചത്. ഹര്ജി അവധിക്ക് ശേഷം വീണ്ടും പരിഗണക്കും.
നഷ്ടപരിഹാരം സര്ക്കാര് നല്കണമെന്ന സിംഗിള് ബഞ്ച് ഉത്തരവ് നിലനില്ക്കില്ലെന്നും സര്ക്കാര് വാദിച്ചു. പൊലീസ് ഉദ്യോഗസ്ഥയുടെ വ്യക്തിപരമായ വീഴ്ചകള്ക്ക് നഷ്ടപരിഹാരം നല്കാന് സര്ക്കാരിന് ബാധ്യത ഇല്ലെന്നും സിംഗിള് ബഞ്ച് ഉത്തരവ് റദ്ധാക്കണമെന്നും സര്ക്കാര് ആവശ്യപ്പെട്ടു.
പൊലീസ് പരസ്യ വിചാരണ ചെയ്ത എട്ട് വയസുകാരിക്ക് ഒന്നര ലക്ഷം രൂപ നഷ്ട പരിഹാരം നല്കണമെന്ന് ഡിസംബര് 22നാണ് ഹൈക്കോടതി സിംഗിള് ബെഞ്ച് ഉത്തരവ് ഇട്ടത്. കൂടാതെ കോടതി ചെലവായി 25000 രൂപ കെട്ടിവയ്ക്കണമെന്നും ഉത്തരവില് വ്യക്തമാക്കിയിരുന്നു. പെണ്കുട്ടിയോടും പിതാവിനോടും മോശമായി പെരുമാറിയ ഉദ്യോഗസ്ഥയെ ക്രമസമാധാന ചുമതലയില് നിന്ന് മാറ്റിനിര്ത്തണമെന്നും സിംഗിള് ബഞ്ച് നിര്ദ്ദേശിച്ചിരുന്നു.