കൊച്ചി: കുട്ടികളെ പുറത്താക്കി അജീഷിന്റെ വീട് ജപ്തി ചെയ്ത നടപടി വിവാദമായിത്തിന് പിന്നാലെ അര്ബന് ബാങ്കില് എംപ്ലോയീസ് യൂണിയനിലെ അംഗങ്ങളായ ജീവനക്കാര് കുടിശിക അടച്ചു തീര്ത്തു.
മൂവാറ്റുപുഴ അര്ബന് ബാങ്കില് അജീഷിന്റെ വായ്പ കുടിശിക സിഐടിയുവിന്റെ കീഴിലുള്ള കോ ഓപ്പറേറ്റീവ് എംപ്ലോയീസ് യൂണിയനാണ് അടച്ചു തീര്ത്തത്. ഇക്കാര്യം ബാങ്ക് പ്രസിഡന്റും സിപിഎം സംസ്ഥാന സമിതി അംഗവുമായ ഗോപി കോട്ടമുറിക്കലാണ് ഫെയ്സ്ബുക്കിലൂടെ അറിയിച്ചത്.
കഴിഞ്ഞദിവസം കുട്ടികളെ പുറത്താക്കി അജീഷിന്റെ വീട് ജപ്തി ചെയ്ത അര്ബന് ബാങ്കിന്റെ നടപടി വിവാദമായിരുന്നു. നാട്ടുകാരുടെ പ്രതിഷേധം ശക്തമായതോടെ മൂവാറ്റുപുഴ എംഎല്എയും കോണ്ഗ്രസ് നേതാവുമായ മാത്യു കുഴല്നാടന്റെ നേതൃത്വത്തില് പൂട്ട് പൊളിച്ച് കുട്ടികളെ അകത്തു കയറ്റുകയായിരുന്നു. ഹൃദ്രോഗിയായ അജീഷ് ആശുപത്രിയില് ചികിത്സയിലാണ്. കൂട്ടിരിക്കാന് ഭാര്യ ആശുപത്രിയില് പോയ സമയത്ത് പെണ്കുട്ടികളെ പുറത്താക്കി വീട് ജപ്തി ചെയ്ത നടപടിക്കെതിരെ വ്യാപകമായ വിമര്ശനമാണ് ഉയര്ന്നത്.