തിരുവനന്തപുരം: സംസ്ഥാനത്ത് ഇന്നും കനത്ത മഴയ്ക്കും ഇടിമിന്നലിനും സാധ്യത. ഉച്ചയോട് കൂടി മഴ കനത്തേക്കും എന്നാണ് കാലാവസ്ഥാ നിരീക്ഷണ കേന്ദ്രത്തിന്റെ അറിയിപ്പ്. ഏഴ് ജില്ലകളില് യെല്ലോ അലര്ട്ട് പ്രഖ്യാപിച്ചു. തിരുവനന്തപുരം മുതല് ഇടുക്കി വരെയുള്ള ജില്ലകളിലാണ് യെല്ലോ അലേര്ട്ട്. ബംഗാള് ഉള്ക്കടലിലുള്ള ചക്രവാത ചുഴിയാണ് മഴയ്ക്ക് കാരണം.
വെള്ളിയാഴ്ച വരെ ശക്തമായ മഴ തുടരും. നാളെയും ഏഴ് ജില്ലകളില് യെല്ലോ അലര്ട്ടാണ്. ശക്തമായ കാറ്റിനും ഇടിമിന്നലിനും സാധ്യതയുണ്ട്. കേരളാതീരത്ത് മത്സ്യബന്ധനത്തിന് വിലക്കേര്പ്പെടുത്തിയിട്ടുണ്ട്.
ഈ ചക്രവാതച്ചുഴിയുടെ സ്വാധീനഫലമായി അറബിക്കടലില് നിന്നും ബംഗാള് ഉള്ക്കടലില് നിന്നുമുള്ള കാറ്റ് അനുകൂലമാകുന്നത് മഴ കനക്കാന് കാരണമാകും. വെള്ളിയാഴ്ചയ്ക്ക് ശേഷം മഴ കുറയാനാണ് സാധ്യത.