പാലക്കാട്: പാലക്കാട് പന്നിയങ്കര ടോള് പ്ലാസയില് സമരം ശക്തമാകുന്നു. പന്നിയങ്കര ടോള് പ്ലാസയിലൂടെ ടോള് നല്കാതെ ബസുകള് കടന്ന് പോകുകയാണ്. ബസുടമകള് തന്നെ ബാരിക്കേഡുകള് മാറ്റിയാണ് ബസുകള് കടത്തിവിടുന്നത്. കഴിഞ്ഞ 28 ദിവസമായി പണിമുടക്കിലായിരുന്ന ബസ് സര്വീസാണ് വീണ്ടും സര്വീസ് തുടങ്ങിയത്. ഭീമമായ തുക ടോള് നല്കാനാവില്ലെന്ന നിലപാടിലാണ് ബസുടമകള്.
ഒരു മാസം 50 ട്രിപ്പിന് 10,540 രൂപയാണ് സ്വകാര്യ ബസുകള് നല്കേണ്ടത്. ഇത് വളരെക്കൂടുതലാണെന്നും നിരക്കില് ഇളവ് വേണമെന്നുമാണ് ഉടമകളുടെ ആവശ്യം. വര്ധിപ്പിച്ച ടോള് നിരക്കിനെതിരെ ടിപ്പര് ലോറികളും ടോള് പ്ലാസയില് നിര്ത്തിയിട്ട് നേരത്തെ പ്രതിഷേധിച്ചിരുന്നു. ഒരു തവണ കടന്നു പോകുന്നതിന് 650 രൂപയാണ് ഇവര് നല്കേണ്ടത്. കഴിഞ്ഞ മാര്ച്ച് ഒന്പത് മുതലാണ് പന്നിയങ്കര ടോള് പ്ലാസയില് ടോള് പിരിവ് തുടങ്ങിയത്.
നിര്മ്മാണ പ്രവര്ത്തനങ്ങള്ക്ക് ഉപയോഗിക്കുന്ന ഭാരം കൂടിയ വാഹനങ്ങള് അടക്കമുള്ളവയ്ക്ക് 430 രൂപയാണ് ഒരുഭാഗത്തേക്ക് നല്കേണ്ടത്. ഇരുഭാഗത്തേക്കും പോകണമെങ്കില് 645 രൂപ വേണം. ഒരു മാസത്തെ പാസിന് 14,315 രൂപയാണ് നല്കേണ്ടത്. വാന്, കാര്, ജീപ്പ്, ചെറിയ വാഹനങ്ങള് തുടങ്ങിയവയ്ക്ക് 90 രൂപ വേണം. ഇരുഭാഗത്തേക്കുമാണെങ്കില് 135 രൂപയും നല്കണം. മിനി ബസ്, ചെറിയ ചരക്ക് വാഹനങ്ങള് എന്നിവയ്ക്ക് 140 രൂപയും ഇരുവശത്തേക്കും 210 രൂപയുമാണ്. ബസ്, ട്രക്ക് എന്നിവയ്ക്ക് ഒരു തവണ പോകാന് 280 രൂപയും ഇരുഭാഗത്തേക്കും 425 രൂപയും ഒരു മാസത്തെ പാസ് 9400 രൂപയുമാണ്.