കൊച്ചി: വെണ്ണല മത വിദ്വേഷ പ്രസംഗ കേസില് മുന് എംഎല്എ പി.സി ജോര്ജിന്റെ മുന്കൂര് ജാമ്യാപേക്ഷ എറണാകുളം ജില്ലാ സെഷന്സ് കോടതി തള്ളി. പാലാരിവട്ടം വെണ്ണലയില് ഒരു ക്ഷേത്രത്തില് നടത്തിയ പ്രസംഗത്തിന്റെ പേരിലാണ് ജോര്ജിനെതിരെ കോസെടുത്തത്.
തിരുവനന്തപുരത്ത് നടന്ന ഹിന്ദു മഹാ സമ്മേളനത്തിലെ പ്രസംഗത്തിന്റെ പേരിലും പി.സി ജോര്ജിനെതിരെ പൊലീസ് കേസെടുത്തെങ്കിലും അദ്ദേഹത്തിന് മുന്കൂര് ജാമ്യം ലഭിച്ചിരുന്നു. വെണ്ണല പ്രസംഗത്തിന്റെ പേരിലുള്ള മുന്കൂര് ജാമ്യാപേക്ഷ തള്ളിയ സാഹചര്യത്തില് പി.സി ജോര്ജിനെ അറസ്റ്റ് ചെയ്യുന്നതടക്കമുള്ള കാര്യങ്ങളുമായി മുന്നോട്ടു പോകാനാണ് പൊലീസിന്റെ തീരുമാനം.
എന്നാല് തിരക്കിട്ട് അറസ്റ്റുണ്ടാകില്ലെന്നാണ് സിറ്റി പൊലീസ് കമ്മീഷണര് നല്കുന്ന സൂചന. 153 എ, 295 എ വകുപ്പുകള് പ്രകാരമാണ് കേസ് രജിസ്റ്റര് ചെയ്തിരിക്കുന്നത്. തിങ്കളാഴ്ച ഹൈക്കോടതിയില് മുന്കൂര് ജാമ്യാപേക്ഷ നല്കുമെന്ന് പി.സി ജോര്ജിന്റെ മകന് ഷോണ് ജോര്ജ് പറഞ്ഞു.