കൊച്ചി: തൃക്കാക്കര ഉപതെരഞ്ഞെടുപ്പിലെ എല്‍ഡിഎഫ് സ്ഥാനാര്‍ത്ഥി ഡോ. ജോ ജോസഫിന്റെ വ്യാജ വീഡിയോ പ്രചരിപ്പിച്ചതിന് അറസ്റ്റിലായ താത്കാലിക ജീവനക്കാരനെ എറണാകുളം മെഡിക്കല്‍ കോളജ് ജോലിയില്‍ നിന്ന് പിരിച്ചുവിട്ടു.
മെഡിക്കല്‍ കോളജില്‍ ക്ലീനിങ് വിഭാഗം ജീവനക്കാരനായ കളമശ്ശേരി എച്ച്എംടി കോളനിയിലെ അരിമ്പാറ വീട്ടില്‍ കെ. ഷിബുവിനെതിരെയാണ് നടപടി. സംഭവത്തില്‍ അഞ്ചുപേര്‍ക്ക് എതിരെയാണ് കേസെടുത്തിരിക്കുന്നത്. കെടിഡിസി ജീവനക്കാരനായ യൂത്ത് കോണ്‍ഗ്രസ് മുന്‍ ഭാരവാഹി ശിവദാസനെ നേരത്തെ അറസ്റ്റ് ചെയ്തിരുന്നു.
കളമശേരി പൊലീസ് അറസ്റ്റ് ചെയ്ത ഷിബുവിനെ തൃക്കാക്കര പൊലീസിന് കൈമാറിയിരുന്നു. ആര്‍ടി ആക്ട്, ഐടി ആക്ട് സെക്ഷന്‍ 67 (എ) പ്രകാരം കേസ് രജിസ്റ്റര്‍ ചെയ്തതായി തൃക്കാക്കര പൊലീസ് സ്റ്റേഷനില്‍ നിന്നും അറിയിപ്പ് ലഭിച്ചതിനെ തുടര്‍ന്നാണ് നടപടിയെന്ന് മെഡിക്കല്‍ കോളജ് പ്രിന്‍സിപ്പല്‍ വ്യക്തമാക്കി. ജോ ജോസഫിനെതിരെ വ്യാജ വീഡിയോ പ്രചരിക്കുന്നത് ചൂണ്ടിക്കാട്ടി എല്‍ഡിഎഫ് മണ്ഡലം സെക്രട്ടറി എം സ്വരാജ് ഡിജിപിക്ക് പരാതി നല്‍കിയിരുന്നു.