കണ്ണൂര്: സംരക്ഷിത വനമേഖലകളുടെ അതിര്ത്തിക്ക് ചുറ്റും ഒരു കിലോമീറ്റര് പരിസ്ഥിതി ലോല മേഖലയായി നിര്ബന്ധമായും വേണമെന്ന സുപ്രീംകോടതി വിധി പ്രതികരിച്ച് വനംമന്ത്രി എകെ ശശീന്ദ്രന്. വിധിയെ നിയമപരമായി നേരിടുമെന്ന് മന്ത്രി പറഞ്ഞു. ജനങ്ങളെ കുടിയൊഴിപ്പിക്കില്ലെന്നതാണ് സര്ക്കാര് നിലപാടെന്ന് അദ്ദേഹം വ്യക്തമാക്കി.
വിഷയത്തില് ആവശ്യമെങ്കില് രാഷ്ട്രീയ ഇടപെടലുകള് നടത്തുമെന്നും കണ്ണൂരില് ഉന്നതതല യോഗത്തിന് ശേഷം മന്ത്രി പറഞ്ഞു. സംരക്ഷിത വനമേഖലകളുടെ അതിര്ത്തിയില് നിന്ന് ഒരു കിലോമീറ്റര് നിര്ബന്ധമായും പരിസ്ഥിതി ലോല മേഖലയായി നിലനിര്ത്തമെന്നാണ് സുപ്രീംകോടതിയില് നിന്നുള്ള നിര്ദ്ദേശം. ഈ മേഖലകളില് ഒരു തരത്തിലുള്ള നിര്മ്മാണ പ്രവര്ത്തികളും അനുവദിക്കില്ല.
ദേശീയ ഉദ്യാനങ്ങളിലും വന്യ ജീവി സങ്കേതങ്ങളിലും ഖനനം പാടില്ല. നിലവില്നടക്കുന്ന നിര്മ്മാണ പ്രവര്ത്തകളെ കുറിച്ച് മൂന്ന് മാസത്തിനകം മുഖ്യവനപാലകര് റിപ്പോര്ട്ട് നല്കണമെന്നും ജസ്റ്റിസ് നാഗേശ്വര് റാവു അധ്യക്ഷനായ ബെഞ്ച് സംസ്ഥാനങ്ങളോട് നിര്ദ്ദേശിച്ചിരിക്കുകയാണ്.