തിരുവനന്തപുരം: സംസ്ഥാനത്ത് ഇന്നും മൂവായിരത്തിന് മുകളില് കോവിഡ് രോഗികള്. 3981 പേര്ക്കാണ് പുതുതായി രോഗ ബാധ സ്ഥിരീകരിച്ചത്. കഴിഞ്ഞ മണിക്കൂറുകളില് ഏഴ് പേര് വൈറസ് ബാധയെ തുടര്ന്ന് മരിച്ചതായി സംസ്ഥാന ആരോഗ്യവകുപ്പ് കണക്കുകള് വ്യക്തമാക്കുന്നു.
കഴിഞ്ഞ ദിവസങ്ങളിലെ പോലെ എറണാകുളത്ത് തന്നെയാണ് ഏറ്റവുമധികം കോവിഡ് രോഗികള്. 970 പേര്ക്ക് കൂടി എറണാകുളം ജില്ലയില് രോഗബാധ സ്ഥിരീകരിച്ചു. തിരുവനന്തപുരത്ത് 880 പേര്ക്കാണ് പുതുതായി രോഗം ബാധിച്ചത്. രാജ്യത്തെ കോവിഡ് കേസുകളില് മൂന്നിലൊന്ന് കേരളത്തിലാണ്.
അതേസമയം സംസ്ഥാനത്ത് കോവിഡിന്റെ പുതിയ വകഭേദം ഇതുവരെ റിപ്പോര്ട്ട് ചെയ്തിട്ടില്ലെന്ന് ആരോഗ്യ മന്ത്രി വീണ ജോര്ജ് പറഞ്ഞു. പുതിയ വകഭേദം ഉണ്ടാകുമോയെന്ന് പരിശോധിച്ചു വരികയാണെന്നും ഇപ്പോള് പരിശോധിച്ചവയില് ഒന്നും പുതിയ വകഭേദം കണ്ടെത്താനായില്ലെന്നും മന്ത്രി അറിയിച്ചു.