തിരുവനന്തപുരം: വിമാനത്താവങ്ങളില് മങ്കിപോക്സ് നിരീക്ഷണം ശക്തിപ്പെടുത്തുന്നു. ഇതിന്റെ ഭാഗമായി ഇന്നു മുതല് പ്രത്യേക കൗണ്ടറുകള് തുറന്നിട്ടുണ്ട്. ലക്ഷണങ്ങളുള്ളവര് എത്തുന്നുണ്ടോയെന്ന് സ്ക്രീന് ചെയ്യും. ഇതിനായി കണ്ണൂര്, നെടുമ്പാശേരി വിമാനത്താവളത്തില് പ്രത്യേക സൗകര്യങ്ങള് ഒരുക്കി.
പ്രത്യേക സുരക്ഷാ മുന്കരുതലുകള് സ്വീകരിക്കണമെന്ന് എല്ലാ വിമാനത്താവളങ്ങളിലും ജീവനക്കാര്ക്ക് നിര്ദേശം നല്കിയിട്ടുണ്ട്. ഇന്നലെ തിരുവനന്തപുരത്ത് സന്ദര്ശനം നടത്തിയ കേന്ദ്രസംഘം രോഗബാധിതന്റെ സ്വദേശമായ കൊല്ലത്ത് ഇന്ന് സന്ദര്ശനം നടത്തും.
രോഗം സ്ഥിരീകരിച്ച് തിരുവനന്തപുരം മെഡിക്കല് കോളജില് ചികിത്സയിലുള്ള യുവാവിന്റെ ആരോഗ്യനില തൃപ്തികരമാണ്. നിരീക്ഷണത്തിലുള്ള മറ്റാര്ക്കും ഇതുവരെ രോഗലക്ഷണങ്ങള് കണ്ടെത്തിയിട്ടില്ല.
ഇന്ത്യയില് ആദ്യമായി മങ്കി പോക്സ് സ്ഥിരീകരിച്ചത് കേരളത്തിലാണ്. വിദേശത്തു നിന്ന് എത്തിയ കൊല്ലം സ്വദേശിക്ക് ജൂലൈ 14 നാണ് മങ്കി പോക്സ് സ്ഥിരീകരിച്ചത്. രോഗിയുമായി കൂടുതല് സമയം അടുത്ത സമ്പര്ക്കത്തിലേര്പ്പെട്ടാല് മാത്രമാണ് രോഗം പകരുക. ഭയപ്പെടേണ്ടതില്ലെന്നും ജാഗ്രത മതിയെന്നും ആരോഗ്യ വകുപ്പ് അറിയിച്ചിട്ടുണ്ട്.