കൊച്ചി: കിഫ്ബി അഴിമതി കേസില് മുന് ധനമന്ത്രി തോമസ് ഐസക്കിന് വീണ്ടും നോട്ടീസ് നല്കി എന്ഫോഴ്സ്മെന്റ് ഡയറക്ട്രേറ്റ്. ഈ മാസം 11 ന് ഹാജരാകാനാണ് ഐസക്കിനോട് നിര്ദേശിച്ചിരിക്കുന്നത്. ഇഡിയുടെ കൊച്ചിയിലെ ഓഫീസില് നേരിട്ട് ഹാജരാകാനാണ് നോട്ടീസിലുള്ളത്.
'മസാല ബോണ്ട്' വഴി വിദേശനിക്ഷേപം സ്വീകരിക്കാന് ശ്രമം തുടങ്ങിയ 2019 മാര്ച്ച് മുതല് കിഫ്ബിയുടെ നീക്കങ്ങള് കേന്ദ്ര സാമ്പത്തിക കുറ്റാന്വേഷണ ഏജന്സികളുടെ നിരീക്ഷണത്തിലായിരുന്നു. കിഫ്ബിയുടെ 'മസാല ബോണ്ട്' നിക്ഷേപ സമാഹരണം വിദേശനാണയ വിനിമയ ചട്ടം ലംഘിച്ചതായുള്ള ആരോപണത്തിനു തുടക്കമിട്ടത് സിഎജി റിപ്പോര്ട്ടിലാണ്.
റിപ്പോര്ട്ട് ലഭിച്ചതിനുശേഷം കിഫ്ബിയുടെ സാമ്പത്തിക ഇടപാടുകള് സംബന്ധിച്ച വിശദാംശങ്ങള് തേടി ഇഡി 2020 നവംബര് 20 നു റിസര്വ് ബാങ്കിനു കത്ത് നല്കിയിരുന്നു.
കഴിഞ്ഞ മാസം 18ന് ഹാജരാകാന് നേരത്തെ നോട്ടീസ് നല്കിയെങ്കിലും അന്ന് മറ്റ് കാരണങ്ങളാല് ഐസക് ഹാജരായിരുന്നില്ല. ഇത് രണ്ടാം തവണയാണ് ഇഡി ഹാജരാകാന് നോട്ടീസ് നല്കിയത്.