പാലക്കാട്: മലമ്പുഴ ഡാമിന്റെ നാല് ഷട്ടറുകള് അഞ്ച് സെന്റിമീറ്റര് വീതം തുറന്നു. ഉച്ചകഴിഞ്ഞ് മൂന്നരയോടെയാണ് ഷട്ടറുകള് ഉയര്ത്തിയത്. 112.36 മീറ്റര് ആണ് നിലവില് അണക്കെട്ടിലെ ജലനിരപ്പ്. നിലവില് ഒരു മണിക്കൂറില് ഒരു സെന്റിമീറ്ററാണ് ജലനിരപ്പ് ഉയരുന്നത്.
റൂള്കര്വ് പ്രകാരം 112.99 മീറ്ററാണ് സംഭരണശേഷി. ഇപ്പോള് ആശങ്കാജനകമായ ജലനിരപ്പ് ഇല്ലെങ്കിലും മഴ തുടരുന്ന സാഹചര്യത്തിലാണ് ഷട്ടറുകള് തുറന്നത്. മുക്കൈപ്പുഴ, കല്പ്പാത്തിപ്പുഴ, ഭാരതപ്പുഴ എന്നിവയുടെ തീരങ്ങളില് ഉള്ളവര് ജാഗ്രത പാലിക്കണമെന്ന് മുന്നറിയിപ്പുണ്ട്.
ഇടുക്കിയില് മഴയ്ക്ക് ശമനമുണ്ടെങ്കിലും ഡാമുകളിലേക്കുള്ള നീറൊഴുക്ക് കുറയാത്ത സാഹചര്യത്തില് പൊന്മുടി, കല്ലാര്കുട്ടി, ലോവര് പെരിയാര് തുടങ്ങിയ ഡാമുകളില് റെഡ് അലര്ട്ട് പ്രഖ്യാപിച്ചു. മുല്ലപ്പെരിയാര് ഡാമില് നിന്നും ഇപ്പോള് ആയിരം ഘനയടി വെള്ളം പുറത്തേക്ക് ഒഴുക്കി വിടുന്നുണ്ട്.