തിരുവനന്തപുരം: ആരോഗ്യ വകുപ്പിന്റെ നേതൃത്വത്തില് ആരോഗ്യ ജാഗ്രതാ ക്യാമ്പയിന്റെ ഭാഗമായി 'മാരിയില്ലാ മഴക്കാലം' ആരംഭിച്ചു. മഴക്കാലമായതിനാല് പകര്ച്ചപ്പനികള്ക്കെതിരെ ജാഗ്രത പാലിക്കേണ്ട സമയമാണെന്ന് ആരോഗ്യ വകുപ്പ് മന്ത്രി വീണാ ജോര്ജ്. മെഡിക്കല് സ്റ്റോറില് നിന്നും ഗുളിക വാങ്ങി സ്വയം ചികിത്സ പാടില്ലെന്നും എല്ലാ പ്രധാന ആശുപത്രികളിലും പനി ക്ലിനിക്കുകള് ആരംഭിച്ചിട്ടുണ്ട്.
ഡെങ്കിപ്പനി, ഇന്ഫ്ളുവന്സ, എലിപ്പനി, സിക എന്നിവ ബാധിക്കാതിരിക്കാന് എല്ലാവരും ഒരുപോലെ ജാഗ്രത പാലിക്കേണ്ടതാണ്. നീണ്ടുനില്ക്കുന്ന പനി പകര്ച്ചപ്പനിയാകാന് സാധ്യതയുള്ളതിനാല് ആരംഭത്തിലെ ചികിത്സ തേടണം.
സര്ക്കാര്, സ്വകാര്യ ആശുപത്രികളില് ചികിത്സാ പ്രോട്ടോകോള് ലഭ്യമാക്കിയിട്ടുണ്ട്. ജീവനക്കാര്ക്ക് പരിശീലന പരിപാടികളും സംഘടിപ്പിച്ചിട്ടുണ്ട്. സംസ്ഥാനത്ത് അവശ്യ മരുന്നുകള് കെ.എം.എസ്.സി.എല്. മുഖേന ലഭ്യമാക്കിയിട്ടുണ്ട്. എല്ലാ ആശുപത്രികളും മരുന്ന് ലഭ്യതയും സുരക്ഷാ സാമഗ്രികളുടെ ലഭ്യതയും ഉറപ്പ് വരുത്തണമെന്നും മന്ത്രി നിര്ദേശം നല്കി.
മഴക്കാലപൂര്വ ശുചീകരണ പ്രവര്ത്തനങ്ങള് സംസ്ഥാനത്ത് ഊര്ജിതമായി നടത്തിയിരുന്നെങ്കിലും നിരന്തരമായ തുടര് പ്രവര്ത്തനങ്ങള് ആവശ്യമാണ്. ഡെങ്കിപ്പനി, സിക പോലുള്ള കൊതുകുജന്യ രോഗങ്ങള് പ്രതിരോധിക്കാനായി കൊതുകിന്റെ ഉറവിട നശീകരണം ഉറപ്പാക്കേണ്ടതാണ്.
ജല സ്ത്രോതസുകളില് മലിന ജലം കലരാതെ സംരക്ഷിക്കണമെന്നും ക്ലോറിനേഷന് കൃത്യമായി ചെയ്യണം. കൂടാതെ, എലിപ്പനിയെ പ്രതിരോധിക്കാന് മണ്ണിലും, ചെളിയിലും, കെട്ടിക്കിടക്കുന്ന വെള്ളത്തിലും ഇറങ്ങുന്നവര് ആരോഗ്യ പ്രവര്ത്തകരുടെ ഉപദേശ പ്രകാരം എലിപ്പനി പ്രതിരോധ ഗുളികയായ ഡോക്സിസൈക്ലിന് ആഴ്ചയിലൊരിക്കല് കഴിക്കണം. ആരോഗ്യ കേന്ദ്രങ്ങള് മുഖേന ഡോക്സിസൈക്ലിന് സൗജന്യമായി വിതരണം ചെയ്യുന്നുണ്ടെന്നും മന്ത്രി കൂട്ടിച്ചേര്ത്തു.