ദുബായ്: യുഎഇയില്‍ സ്വകാര്യമേഖലയിലെ ജീവനക്കാർക്കുളള ഈദ് അല്‍ അദ അവധി പ്രഖ്യാപിച്ചു. ജൂണ്‍ 27 ചൊവ്വാഴ്ച മുതല്‍ ജൂണ്‍ 30 വെളളിയാഴ്ച വരെയാണ് അവധി. അതായത് ദുല്‍ഹിജ്ജ 9 മുതല്‍ 12 വരെ. മാനവ വിഭവശേഷി സ്വദേശിവല്‍ക്കരണ മന്ത്രാലയമാണ് അവധി പ്രഖ്യാപിച്ചത്.
ഈദ് അല്‍ അദ അവധിയും വാരാന്ത്യ അവധിയും ഒരുമിച്ച് വരുന്നതോടെ യുഎഇയിലെ ജീവനക്കാർക്ക് ആറ് ദിവസം അവധി ലഭിക്കും. ജൂലൈ 3 മുതല്‍ ജോലി പുനരാരംഭിക്കും.
സ്വകാര്യ ജീവനക്കാർക്ക് ഈ വ‍ർഷം ലഭിക്കുന്ന ഏറ്റവും ദൈർഘ്യമേറിയ ശമ്പളത്തോടുകൂടിയ അവധിയായിരിക്കും ഇത്. എന്നാല്‍ ജൂണ്‍ 26 പ്രവൃത്തി ദിനം കൂടി അവധിയെടുത്താല്‍ ജൂണ്‍ 24, 25 വാരാന്ത്യ അവധി കൂടി ചേർത്ത് 9 ദിവസമാണ് അവധി ലഭിക്കുക.