കൊച്ചി: കൊച്ചി തീരത്ത് മത്സ്യബന്ധന വള്ളത്തില്‍ കപ്പലിടിച്ച് അപകടം. എംഎസ്‌സി കമ്പനിയുടെ കപ്പലാണ് കണ്ണമാലിക്ക് സമീപം പുറം കടലില്‍വച്ച് വള്ളത്തില്‍ ഇടിച്ചത്. ബുധനാഴ്ച വൈകുന്നേരം അഞ്ചിന് ശേഷമായിരുന്നു സംഭവം.
അപകടത്തില്‍ ആര്‍ക്കും പരിക്കേറ്റിട്ടില്ലെന്ന് മത്സ്യത്തൊഴിലാളികള്‍ വ്യക്തമാക്കി. പള്ളിത്തൊഴു സ്വദേശി സ്റ്റാലിന്‍ എന്നയാളുടെ ഉടമസ്ഥതയിലുള്ള 'പ്രത്യാശ' എന്ന വള്ളത്തിലാണ് കപ്പല്‍ ഇടിച്ചത്. കണ്ണമാലിക്ക് പടിഞ്ഞാറ് എട്ട് നോട്ടിക്കല്‍ മൈല്‍ അകലെ നിര്‍ത്തിയിട്ട് മീന്‍ പിടിക്കുകയായിരുന്നു. ഇതിനിടെ ആണ് അപകടം.
അപകടത്തില്‍ വള്ളത്തിന് സാരമായ കേടുപാടുകള്‍ സംഭവിച്ചു. സംഭവത്തില്‍ കപ്പലിനെതിരെ പരാതി നല്‍കുമെന്ന് തൊഴിലാളികള്‍ അറിയിച്ചു.