കൊച്ചി: ഇതര സംസ്ഥാന തൊഴിലാളികളെ ലഹരി വിമുക്തരാക്കാന്‍ സിനിമാ പ്രദര്‍ശനവുമായി കേരള പൊലീസ്. ഞായറാഴ്ച പെരുമ്പാവൂരിലെ ഇവിഎം തിയേറ്ററിലാണ് ലഹരിക്കെതിരെയുള്ള ബംഗാളി സിനിമയായ 'പാവോ' പ്രദര്‍ശിപ്പിക്കുക. എറണാകുളം റൂറല്‍ ജില്ലാ പൊലീസിന്റെ 'ഓപ്പറേഷന്‍ പുനര്‍ജനി' പദ്ധതിയുടെ ഭാഗമായാണ് സിനിമാ പ്രദര്‍ശനം.
ഇതര സംസ്ഥാന തൊഴിലാളികളെ ലഹരി വിമുക്തരാക്കാനായി എറണാകുളം റൂറല്‍ ജില്ലാ പൊലീസ് ആവിഷ്‌കരിച്ച പദ്ധതിയാണ് 'ഓപ്പറേഷന്‍ പുനര്‍ജനി'. റൂറല്‍ ജില്ലാ പൊലീസ് മേധാവി എം. ഹേമലത ഉള്‍പ്പെടെയുള്ള പൊലീസ് ഉദ്യോഗസ്ഥരും ജനപ്രതിനിധികളും ഞായറാഴ്ച നടക്കുന്ന സിനിമാ പ്രദര്‍ശനത്തില്‍ ഇതര സംസ്ഥാന തൊഴിലാളികള്‍ക്കൊപ്പം ഇരുന്ന് സിനിമ കാണും.