ഇടുക്കി: ദുരിത പെയ്ത്ത് തുടരുന്ന ഇടുക്കിയില്‍ ഒരു മരണം. പാറപ്പള്ളിയില്‍ വീട്ടില്‍ തങ്കച്ചനാണ് മരിച്ചത്. കനത്ത മഴയില്‍ റോഡിലേക്ക് പതിച്ച മണ്‍കൂനയിലേയ്ക്ക് ബൈക്ക് ഇടിച്ചു കയറുകയായിരുന്നു.
കുമളി ആനവിലാസം റോഡില്‍ പുത്തന്‍കട ഭാഗത്ത് ഇന്നലെ രാത്രി 12 നാണ് അപകടം ഉണ്ടായത്. മൃതദേഹം കട്ടപ്പന സര്‍ക്കാര്‍ ആശുപത്രിയിലേക്ക് മാറ്റി.
കട അടച്ചശേഷം വീട്ടിലേക്ക് പോകുമ്പോഴായിരുന്നു അപകടം. പ്രദേശത്ത് ഇന്നലെ രാത്രി ഏഴ് മുതല്‍ കനത്ത മഴയായിരുന്നു. മഴയില്‍ റോഡിലേക്ക് കല്ലും മണ്ണും പതിച്ച് കിടന്നിരുന്നു. ഇതറിയാതെ മണ്‍കൂനയിലേക്ക് ഇടിച്ചു കയറി റോഡില്‍ തലയിടിച്ചു വീണാണ് മരണം സംഭവിച്ചത്.