മൂന്നാര്‍: മൂന്നാര്‍ ആനച്ചാലില്‍ ആകാശ ഭക്ഷണ ശാലയില്‍ വിനോദ സഞ്ചാരികള്‍ കുടുങ്ങിയ സംഭവത്തില്‍ സ്ഥാപനം താല്‍കാലികമായി അടച്ചു പൂട്ടാന്‍ ജില്ലാ ഭരണ കൂടത്തിന്റെ നിര്‍ദേശം.
സതേണ്‍ സ്‌കൈസ് എയ്‌റോ ഡൈനാമിക്‌സ് എന്ന സ്ഥാപനത്തിനാണ് മതിയായ സുരക്ഷാ സംവിധാനങ്ങള്‍ ഇല്ലാതെ പ്രവര്‍ത്തിച്ചതിന് സ്റ്റോപ്പ് മെമോ നല്‍കിയത്. സ്ഥാപനത്തിന്റെ നടത്തിപ്പുകാര്‍ക്കെതിരെ പൊലീസ് കേസെടുത്തിട്ടുണ്ട്.
ജില്ലാ ദുരന്ത നിവാരണ അതോറിറ്റി ചെയര്‍മാന്‍ എന്ന നിലയില്‍ ജില്ലാ കളക്ടരുടെ നിര്‍ദേശ പ്രകാരം തഹസില്‍ദാര്‍ നടത്തിയ പരിശോധനയിലാണ് സ്ഥാപനത്തിന് മതിയായ രേഖകള്‍ ഇല്ലെന്ന് കണ്ടെത്തിയത്. ഇതേ തുടര്‍ന്നാണ് സതേണ്‍ സ്‌കൈസ് എയ്‌റോ ഡൈനാമിക്‌സ് എന്ന സ്ഥാപനം താല്‍ക്കാലികമായി അടച്ചു പൂട്ടാന്‍ ഉത്തരവിട്ടത്.
നടത്തിപ്പുകാരായ ഉടുമ്പന്നൂര്‍ പുളിക്കമറയില്‍ പ്രവീണ്‍, സോജന്‍ എന്നിവര്‍ക്കെതിരെയാണ് പൊലീസ് കേസ് രജിസ്റ്റര്‍ ചെയ്തിട്ടുള്ളത്. ഇന്നലെ ഉച്ചയോടെ സ്‌കൈ ഡൈനിങിന് എത്തിയ കോയമ്പത്തൂര്‍ സ്വദേശികളായ കുട്ടികള്‍ ഉള്‍പ്പെടുന്ന മലയാളി വിനോദ സഞ്ചാരികളും സ്ഥാപനത്തിലെ ഒരു ജീവനക്കാരിയുമാണ് മണിക്കൂറുകള്‍ ആകാശ ഭക്ഷണ ശാലയില്‍ കുടുങ്ങിയത്.