കോട്ടയം: കേരള കോണ്ഗ്രസ് എമ്മിന്റെ നിര്ണായക സ്റ്റിയറിങ് കമ്മിറ്റി ഇന്ന് കോട്ടയത്ത് നടക്കും. കേരള കോണ്ഗ്രസ് എമ്മിന്റെ മുന്നണി മാറ്റത്തിന് തടയിട്ടത് മുഖ്യമന്ത്രി എന്ന വിവരങ്ങള്ക്കിടെയാണ് നിര്ണായക കമ്മിറ്റി ചേരുന്നത്. ഇന്ന് രാവിലെ പതിനൊന്നിന് കോട്ടയത്തെ സംസ്ഥാന കമ്മിറ്റി ഓഫീസിലാണ് യോഗം ചേരുന്നത്.
അതേസമയം ആരൊക്കെ യോഗത്തില് പങ്കെടുക്കും എന്നതില് വ്യക്തവരുത്തിയിട്ടില്ല. നിലവില് ഉയരുന്ന മുന്നണി മാറ്റ ചര്ച്ചകള് സംബന്ധിച്ചും യോഗത്തില് ചര്ച്ചയാകും. കഴിഞ്ഞ ദിവസം ജോസ് കെ. മാണി മുന്നണി മാറ്റ ചര്ച്ചകളെ തള്ളിയെങ്കിലും അണികള്ക്കിടയില് ആശയക്കുഴപ്പം തുടരുകയാണ്. മുന്നണി മാറിയാല് റോഷി അഗസ്റ്റ്യന് അടക്കം മുഴുവന് ആളുകളെയും ഒന്നിച്ച് യുഡിഎഫില് എത്തിക്കാനാണ് പാര്ട്ടിക്കുള്ളില് ശ്രമം നടക്കുന്നത്.
ഒപ്പം ജില്ലാ കമ്മിറ്റികളെയെല്ലാം ഒപ്പം നിര്ത്താനുള്ള നീക്കങ്ങളും തുടരും. തദ്ദേശ തിരഞ്ഞെടുപ്പ് കഴിഞ്ഞുള്ള ആദ്യ സ്റ്റിയറിങ് കമ്മിറ്റി യോഗം കൂടിയാണ് ഇന്ന് നടക്കുന്നത്.