ന്യൂയോര്ക്ക്: നാസയുടെ ഗവേഷണ വിമാനത്തിന് അടിയന്തര ലാന്ഡിങ്. ലാന്ഡിങ് ഗിയറിലുണ്ടായ തകരാറിനെ തുടര്ന്നാണ് അടിയന്തരമായി ലാന്ഡിങ് വേണ്ടി വന്നത്.
ഹ്യൂസ്റ്റണിനടുത്തുള്ള എല്ലിങ്ടണ് വിമാനത്താവളത്തില് വിമാനം ലാന്ഡ് ചെയ്യുകയും റണ്വേയിലൂടെ തെന്നി മാറുകയും ചെയ്തു. സോഷ്യല് മീഡിയയില് പങ്കിട്ട വീഡിയോകളില് വിമാനം റണ്വേയിലൂടെ നീങ്ങുമ്പോള് അടിയില് നിന്ന് തീപ്പൊരികളും തീജ്വാലകളും പുകയും ഉയരുന്നത് കാണാം.
വിമാനത്തിലെ ജീവനക്കാര് സുരക്ഷിതരാണെന്നും ആര്ക്കും പരിക്കേറ്റിട്ടില്ലെന്നും നാസ അറിയിച്ചു. മെക്കാനിക്കല് പ്രശ്നമുണ്ടെന്നും സംഭവത്തെപ്പറ്റി അന്വേഷണം നടത്തുമെന്നും നാസ വ്യക്തമാക്കിയിട്ടുണ്ട്.
രണ്ട് ജീവനക്കാരുള്ള നാസ WB-57 എന്ന ഉയര്ന്ന ഉയര ഗവേഷണ വിമാനമായിരുന്നു അപകടത്തില്പ്പെട്ടത്. വളരെ ഉയര്ന്ന ഉയരത്തില് പറക്കാന് രൂപകല്പ്പന ചെയ്തിട്ടുള്ള ഈ വിമാനത്തിന് ഒറ്റയടിക്ക് ആറ് മണിക്കൂറിലധികം പറക്കാന് കഴിയും.
കോക്ക്പിറ്റ് ഹാച്ച് തുറന്ന നിലയില് വിമാനം റണ്വേയില് നിര്ത്തിയിട്ടിരിക്കുന്നതായി പ്രാദേശിക ടെലിവിഷന് ദൃശ്യങ്ങള് കാണിച്ചു. അഗ്നിശമന സേനാംഗങ്ങളും അടിയന്തര സംഘങ്ങളും സ്ഥലത്ത് വിമാനത്തിന് സമീപത്തെത്തി. അര നൂറ്റാണ്ടിലേറെയായി നാസ ഗവേഷണ ദൗത്യങ്ങള്ക്കായി WB-57 ഉപയോഗിച്ചു വരുന്നു.