ന്യൂഡല്ഹി: നീറ്റ് പരീക്ഷാ പേപ്പര് ചോര്ച്ചയുമായി ബന്ധപ്പെട്ട് ജന്തര് മന്തറിലും വിവിധ സംസ്ഥാനങ്ങളിലും നടന്ന വിദ്യാര്ഥി പ്രതിഷേധങ്ങള്ക്ക് നേരെ പൊലീസ് അതിക്രമം കാണിച്ചെന്ന ആരോപണത്തില് അന്വേഷണത്തിന് ഉത്തരവിട്ട് സുപ്രീം കോടതി. പൊലീസിന്റെയും പാരാമിലിട്ടറി സേനകളുടെയും നടപടികളെക്കുറിച്ച് അന്വേഷിക്കാന് സുപ്രീം കോടതി ചീഫ് ജസ്റ്റിസ് സൂര്യകാന്ത് അഞ്ചംഗ ഉന്നതാധികാര സമിതിക്ക് രൂപം നല്കി.
വിരമിച്ച സുപ്രീം കോടതി ജസ്റ്റിസ് സുഭാഷ് റെഡ്ഡിയാണ് അന്വേഷണ സമിതിക്ക് നേതൃത്വം നല്കുന്നത്. ഉന്നതതല അന്വേഷണ സംഘത്തില് സുപ്രീം കോടതി ജഡ്ജിക്ക് പുറമെ ഹൈക്കോടതികളില് നിന്ന് വിരമിച്ച രണ്ട് ജഡ്ജിമാരും മുന് മുതിര്ന്ന ഐ.പി.എസ് ഉദ്യോഗസ്ഥരും ഉള്പ്പെടുന്നു. പഞ്ചാബ്-ഹരിയാന ഹൈക്കോടതി മുന് ചീഫ് ജസ്റ്റിസ് രവിശങ്കര് ഝാ, ഡല്ഹി ഹൈക്കോടതിയില് നിന്ന് വിരമിച്ച ജസ്റ്റിസ് ശൈലേന്ദ്ര കൗര്, മുന് സി.ബി.ഐ ഡയറക്ടര് ഋഷികുമാര് ശുക്ല, മുതിര്ന്ന പൊലീസ് ഉദ്യോഗസ്ഥനായ ഐ.ആര് ബിഷ്ണോയി എന്നിവരാണ് സമിതിയിലെ മറ്റ് അംഗങ്ങള്.
സമരക്കാരെ നേരിടുന്നതില് സുരക്ഷാ സേനയുടെ ഭാഗത്ത് നിന്ന് പരിധിവിട്ട ബലപ്രയോഗം ഉണ്ടായിട്ടുണ്ടോ എന്നാണ് സമിതി പ്രധാനമായും പരിശോധിക്കുന്നത്. വിദ്യാര്ഥികള്ക്ക് നേരെ പെലറ്റ് ഗണ്ണുകള് പ്രയോഗിച്ചിട്ടുണ്ടോ, മുന്കൂട്ടി യാതൊരു മുന്നറിയിപ്പുമില്ലാതെ ഇലക്ട്രിക് ബാറ്റണുകള് ഉപയോഗിച്ചോ തുടങ്ങിയ ഗുരുതരമായ ആരോപണങ്ങളിലും സമിതി വിശദമായ അന്വേഷണം നടത്തും. സമഗ്രമായ അന്വേഷണ റിപ്പോര്ട്ട് സമിതി ഉടന് തന്നെ സുപ്രീം കോടതിക്ക് സമര്പ്പിക്കും.